മലപ്പുറം: നിലന്പൂർ ഫോറസ്റ്റ് ഓഫീസ് ഡിഎംകെ പ്രവർത്തകർ തകർത്ത സംഭവത്തിൽ റിമാൻഡിലായ പി.വി. അൻവർ എംഎൽഎയെ തവനൂർ സെൻട്രൽ ജയിലിൽ എത്തിച്ചു. ഇന്ന് അൻവൻ ജാമ്യാപേക്ഷ നൽകുമെന്നാണ് വിവരം.
കേസുമായി ബന്ധപ്പെട്ട് അറസ്റ്റിലായ മറ്റ് നാലു പേരേയും അൻവറിനൊപ്പം ജയിലിലേക്ക് മാറ്റിയിട്ടുണ്ട്. സംഭവത്തിൽ അൻവർ ഉൾപ്പെടെ 11 പേർ‌ക്കെതിരെയാണ് കേസെടുത്തിരിക്കുന്നത്. പി.വി. അൻവറാണ് കേസിലെ ഒന്നാം പ്രതി.
കൃത്യനിർവഹണം തടയൽ, പൊതുമുതൽ നശിപ്പിക്കൽ അടക്കമുള്ള വകുപ്പുകൾ പ്രകാരമാണ് കേസെടുത്തത്. നിലന്പൂർ പോലീസാണ് കേസെടുത്തത്.
ഒതായിയിലെ വീട്ടിലെത്തിയാണ് പോലീസ് അൻവറിനെ അറസ്റ്റ് ചെയ്തത്. നിലമ്പൂർ സിഐ സുനിൽ പള്ളിക്കലിന്‍റെ നേതൃത്വത്തിലുള്ള സംഘമാണ് അൻവറിന്‍റെ വീട്ടിലെത്തി അറസ്റ്റ് രേഖപ്പെടുത്തിയത്.
ആദിവാസി യുവാവിനെ ആന ചവിട്ടിക്കൊന്നതിൽ പ്രതിഷേധിച്ച് നടത്തിയ മാർച്ചാണ് വനംവകുപ്പ് ഓഫീസ് ആക്രമണത്തിലേക്കെത്തിയത്. എഫ്ഐആറിൽ അൻവറിന്‍റെ മാത്രമാണ് പേരുളളത്.