ലണ്ടൻ: ലണ്ടനിലെ സെന്‍റ് ജോണ് ബോസ്കോ കോളേജിൽ മണിക്കൂറുകൾ നീണ്ടു നിന്ന ബൈബിൾ കലോത്സവം തിരുവചന അക്ഷരാഖ്യാനങ്ങളുടെ മികവുറ്റ സംഗീത, നൃത്ത, നടന ആവിഷ്കാരങ്ങളിലൂടെ അനുഗ്രഹ സാന്ദ്രമായി. അതുല്യമായ കലാവൈഭവ പ്രകടനങ്ങൾ അരങ്ങുവാണ വേദി അക്ഷരാർത്ഥത്തിൽ വിശ്വാസ പ്രഘോഷണങ്ങളുടെ വിളനിലം തീർക്കുകയായിരുന്നു.
വിശുദ്ധ ഗ്രന്ഥം പ്രതിഷ്ഠിച്ചു കൊണ്ട് നിലവിളക്കു കൊളുത്തി ശുഭാരംഭം കുറിച്ച ലണ്ടൻ റീജണൽ ബൈബിൾ കലോത്സവത്തിൽ ഫാ.തോമസ് പാറയടി,റീജണൽ സഹകാരി ഫാ.ജോസ് അന്ത്യാംകുളം, ഫാ.സെബാസ്റ്റ്യൻ ചാമക്കാല, ആതിഥേയ കോളേജിന്റെ പ്രതിനിധിയും സലേഷ്യൻ വൈദികനുമായ ഫാ.സാജു മുല്ലശ്ശേരി, ഡീക്കൻ ജോയ്സ് ജെയിംസ് എന്നിവർ നേതൃത്വം നൽകി. ലണ്ടൻ റീജിയണലിലെ വെസ്റ്റ്മിൻസ്റ്റർ, ബ്രെൻഡ്വുഡ്, സൗത്താർക്ക് തുടങ്ങിയ ചാപ്ലിൻസികളുടെ കീഴിലുള്ള 22 കുർബ്ബാന കേന്ദ്രങ്ങളിൽ നിന്നായി വിജയിച്ചെത്തിയ മത്സരാർത്ഥികൾ അതുല്യമായ കലാ നൈപുണ്യമാണ് വേദിയിൽ പുറത്തെടുത്തത്.
പാട്ട്, ഡാൻസ്, ടാബ്ലോ, പ്രശ്ചന്ന വേഷം, സ്കിറ്റ്, ബൈബിൾ ക്വിസ്, ബൈബിൾ റീഡിംഗ്, ഉപന്യാസം, പ്രസംഗം,പെയിന്‍റിംഗ്, ചിത്ര രചന അടക്കം പ്രായാടിസ്ഥാനത്തിൽ നടത്തപ്പെട്ട നിരവധി മത്സരങ്ങൾ അത്യന്തം ആവേശവും വാശിയും നിറഞ്ഞതായി. മികവുറ്റ സംഘാടകത്വവും, സമയ നിഷ്ഠമായ ഒരുക്കങ്ങളും സുഗമമായ ക്രമീകരണങ്ങളും ഏറെ പ്രശംസനീയമായി.
സ്റ്റീവനേജ്, വാൽത്തംസ്റ്റോ, ഈസ്റ്റ്ഹാം തുടങ്ങിയ പാരീഷ് സമൂഹങ്ങൾ മത്സരങ്ങളിൽ കൂടുതൽ നേട്ടങ്ങൾ കൊയ്തപ്പോഴും എല്ലാ കുർബ്ബാന കേന്ദ്രങ്ങളും തന്നെ ശക്തമായ മത്സരങ്ങളും വിജയങ്ങളും പുറത്തെടുത്താണ് പിരിഞ്ഞത്. അബ്രാഹത്തിന്‍റെ ബലി എന്ന ബൈബിൾ സ്കിറ്റ് കലോത്സവത്തിലെ ഏറ്റവും ശ്രദ്ധേയവും ഹൈലൈറ്റുമായി.
| |
കലോത്സവ സമാപനത്തിൽ വിജയികൾക്കുള്ള സർട്ടിഫിക്കേറ്റ് വിതരണവും നടത്തപ്പെട്ടു. ഉപന്യാസം,ചിത്ര രചന, പെയിന്‍റിങ് അടക്കം ചില മത്സരങ്ങളുടെ ഫലം പിന്നീട് അറിയിക്കും. അതിനു ശേഷമേ റീജണൽ കലോത്സവത്തിലെ ഓവറോൾ ജേതാക്കളെയും,കലാ തിലകത്തെയും പ്രഖ്യാപിക്കാനാവൂ.
റീജണൽ ബൈബിൾ കലോത്സവത്തെ വൻ വിജയമാക്കി തീർത്ത ഏവർക്കും ഫാ.ജോസ് അകൈതവമായ നന്ദി പ്രകാശിപ്പിച്ചു. ഗ്രേറ്റ് ബ്രിട്ടൻ രൂപതാ ബൈബിൾ കലോത്സവ ഗ്രാൻഡ് ഫിനാലെ നവംബർ നാലിന് ബ്രിസ്റ്റോളിൽ വച്ചു നടത്തപ്പെടും.
റിപ്പോര്‍ട്ട്: അപ്പച്ചന്‍ കണ്ണന്‍ചിറ
|