ബെർക്കിൻഹെഡ്: ഷ്രൂഷ്ബറി രൂപതയിലെ വിവിധ ഇടവകകളിൽ നിന്നുള്ള പ്രതിഭകൾ മാറ്റുരക്കുന്ന ബൈബിൾ കലോത്സവം നവംബർ 12ന് (ശനി) ബെർക്കിൻഹെഡിൽ നടക്കും. രാവിലെ 9.30 മുതൽ സെന്റ് ജോസഫ് കാത്തലിക് പ്രൈമറി സ്കൂളിൽ ആണ് മത്സരം.
രണ്ടു വേദികളിലായി 12 ഓളം ഇനങ്ങളിലായിട്ടാണ് മത്സരങ്ങൾ. രൂപതയിലെ മാഞ്ചസ്റ്റർ,ബെർക്കിൻഹെഡ്, ചെസ്റ്റർ, നോർത്ത്വിച്ച്, ടെൽഫോർഡ്, ക്രൂ, സ്റ്റോക്ക്പോർട്ട്, വിരാൽ എന്നീ ഇടവകകളിൽ നിന്നുള്ള പ്രതിഭകൾ മത്സരങ്ങളിൽ മാറ്റുരക്കും. ഇടവക തലത്തിൽ നടന്ന മത്സരങ്ങളിൽ ആദ്യ മൂന്നു സ്‌ഥാനങ്ങളിൽ എത്തിയവർക്കാണ് മത്സരത്തിൽ പങ്കെടുക്കാനർഹത.
വിശുദ്ധ ഗ്രന്ഥ പാരായണം, പ്രസംഗം, ഭക്‌തിഗാന മത്സരം, ബൈബിൾ സ്റ്റോറി ടെല്ലിംഗ്, മോണോ ആക്ട്, ബൈബിൾ ക്വിസ്, ഫാൻസിഡ്രസ്, ഗ്രൂപ്പ് ഡാൻസുകൾ, ഗ്രൂപ്പ് സോംഗ്, സ്കിറ്റുകൾ, മാർഗംകളി തുടങ്ങിയ ഇനങ്ങളിലാണ് മത്സരങ്ങൾ.
സമാപന സമ്മേളനത്തിൽ ഗ്രേറ്റ് ബ്രിട്ടൻ രൂപത ബിഷപ് മാർ ജോസഫ് ശ്രാമ്പിക്കൽ മുഖ്യാതിഥിയായി പങ്കെടുത്ത് സമ്മാനങ്ങൾ വിതരണം ചെയ്യും. പരിപാടിയിൽ നിരവധി വൈദിക ശ്രേഷ്‌ടരും പങ്കെടുക്കും.
പരിപാടിയുടെ വിജയത്തിനായി ഷ്രൂഷ്റി രൂപത സീറോ മലബാർ ചാപ്ലിൻ റവ.ഡോ.ലോനപ്പൻ അരങ്ങാശേരിയുടെ നേതൃത്വത്തിൽ ട്രസ്റ്റിമാരായ ജോഷി ജോസഫ്, ബിജു ജോർജ്, കെ.ജെ. ജോസഫ്, സൺഡേ സ്കൂൾ ഹെഡ് ടീച്ചർ സജിത്ത് തോമസ് എന്നിവർ കൺവീനർമാരായി വിവിധ കമ്മിറ്റികൾ നിലവിൽ വന്നു.
വിലാസം: St. Joseph’s Catholic Primary School, Woodchurch Road Oxton, Wirral CH43 5UT.
|