ന്യൂഡല്‍ഹി: പ്രവാസികാര്യ മന്ത്രാലയം നിര്‍ത്തലാക്കിയ കേന്ദ്രസര്‍ക്കാര്‍ നടപടി പുനഃപരിശോധിക്കണമെന്നാവശ്യപ്പെട്ടു ഒഐസിസി നേതാക്കളും കേരളത്തില്‍ നിന്നുള്ള ഐക്യജനാധിപത്യ പ്രതിനിധി സംഘവും കേന്ദ്ര വിദേശകാര്യ മന്ത്രി സുഷമ സ്വരാജുമായി ചര്‍ച്ച നടത്തി. കൂടിക്കാഴ്ചയ്ക്കു ലോക്സഭയിലെ കോണ്‍ഗ്രസ് ഡെപ്യൂട്ടി വിപ്പ് കെ.സി. വേണുഗോപാല്‍ എംപി നേതൃത്വം നല്‍കി.
പതിനെട്ടു വയസു വരെയുള്ള എന്‍ആര്‍ഐ കുട്ടികള്‍ക്ക് ഇരട്ടപൌരത്വം നല്‍കണമെന്ന നിര്‍ദ്ദേശം ജിന്‍സണ്‍ ഫ്രാന്‍സ് കല്ലുമാടിക്കല്‍ (യൂറോപ്പ് കോഓര്‍ഡിനേറ്റര്‍, ജര്‍മനി) ചര്‍ച്ചയില്‍ ഉന്നയിച്ചു. കാര്യങ്ങളെപ്പറ്റി പഠിച്ചിട്ട് ഗൌരവപൂര്‍വം പരിഗണിക്കാമെന്നു മന്ത്രി പറഞ്ഞു. കൂടാതെ പ്രവാസികാര്യ മന്ത്രാലയം നിര്‍ത്തലാക്കല്‍, നഴ്സുമാര്‍ നേരിടുന്ന പ്രശ്നങ്ങള്‍ തുടങ്ങിയവ ചര്‍ച്ചയില്‍ ഉയര്‍ന്നുവന്നു.
എംപിമാരായ ജോസ് കെ. മാണി, എന്‍.കെ. പ്രേമചന്ദ്രന്‍, കേരള മുന്‍ പ്രവാസി മന്ത്രിയും കെപിസിസി വൈസ് പ്രസിഡന്റുമായ എം.എം. ഹസന്‍ എന്നിവര്‍ക്കു പുറമെ, ഒഐസിസി ചുമതലയുള്ള കെപിസിസി ജനറല്‍ സെക്രട്ടറി എന്‍.സുബ്രഹ്മണ്യം, പി.എം സുരേഷ് ബാബു, കെപിസിസി ജനറല്‍ സെക്രട്ടറിമാരായ മാന്നാര്‍ അബ്ദുള്‍ ലത്തീഫ്, പി.റ്റി. അജയ്മോഹന്‍, ഒഐസിസി ഗ്ളോബല്‍ സെക്രട്ടറി ഷെരീഫ് കുഞ്ഞി, വക്താവ് മന്‍സൂര്‍ പള്ളൂര്‍, ജിന്‍സണ്‍ ഫ്രാന്‍സ് കല്ലുമാടിയ്ക്കല്‍ (യൂറോപ്പ് കോഓര്‍ഡിനേറ്റര്‍, ജര്‍മനി), സി.ആര്‍.ജി. നായര്‍ (യുഎഇ), വൈ.എ. റഹീം (ഷാര്‍ജ ഇന്ത്യ അസോസിയേഷന്‍ പ്രസിഡന്റ്), പി.എം. നജീവ് (കെഎസ്എ), രാജു കല്ലുംപുറം (ബഹറിന്‍),കെ.കെ. ഉസ്മാന്‍(ഖത്തര്‍), സിദ്ദിഖ് ഹസന്‍ (ഒമാന്‍), വര്‍ഗീസ് പുതുക്കുളങ്ങര (കുവൈത്ത്), ഐസക് തോമസ് (പ്രവാസി റിട്ടേര്‍ണി കോണ്‍ഗ്രസ്) എന്നിവരും ചര്‍ച്ചയില്‍ പങ്കെടുത്തു.
ഭരണപരമായ സൌകര്യത്തിന്റെ പേരിലാണു പ്രവാസികാര്യവകുപ്പ് നിര്‍ത്തലാക്കിയതെന്ന മന്ത്രിയുടെ വാദം അംഗീകരിക്കാന്‍ കഴിയില്ലെന്നു കെ.സി. വേണുഗോപാല്‍ എംപി മന്ത്രിയെ അറിയിച്ചു.
റിപ്പോര്‍ട്ട്: ജോസ് കുമ്പിളുവേലില്‍
|