ഫിലഡൽഫിയ: ഇന്ത്യയുടെ ചന്ദ്രയാൻ 3 ചന്ദ്രോപരിതലത്തിൽ സോഫ്റ്റ്ലാൻഡ് ചെയ്തു വിജയം വരിച്ചതുപോലെ ഫിലാഡൽഫിയായിലെ ഒരു പറ്റം വെക്കേഷൻ ബൈബിൾ സ്കൂൾ കുട്ടികളുടെ ഭാവന ബഹിരാകാശം വരെ ചിറകുവിരിച്ച് ചന്ദ്രന്‍റെ ദക്ഷിണധ്രൂവത്തിൽ ടച്ച്ഡൗണ്‍ ചെയ്ത് പുതിയ കണ്ടുപിടുത്തങ്ങളും സാഹസികയാത്രകളും ബഹിരാകാശചിത്രങ്ങളുമായി ഒരാഴ്ച നീണ്ടുനിന്ന ബൈബിൾ എക്സ്പെഡീഷൻ ഫെയ്ത്ത്‌ലാൻഡ് ചെയ്തു.
ബഹിരാകാശയാത്രയും ഗഗനചാരികളും താരാപഥങ്ങളും റോക്കറ്റും ശൂന്യാകാശസൂട്ടുമൊക്കെയായിന്നു ഈ വര്‍ഷത്തെ വിബിഎസ് തീം.
ജീവിതം അന്ധകാരതുല്യമാകുക, തമ്മില്‍ ഒത്തുപോകാതിരിക്കുക, സുകൃതങ്ങള്‍ സംഭവിക്കുക, സഹജീവികള്‍ ദുഖിതരായിരിക്കുക എന്നീ നിമിഷങ്ങളില്‍ "ഞാന്‍ ലോകത്തിന്‍റെ പ്രകാശമാകുന്നു' എന്നു ചെയ്ത ജീസസിന്‍റെ പ്രകാശകിരണങ്ങള്‍ സഹോദരരില്‍ വര്‍ഷിക്കാന്‍ നാം കടപ്പെട്ടവരാണെന്നുള്ള ബൈബിള്‍ സന്ദേശങ്ങള്‍ കുട്ടികള്‍ ഈ സാഹസിക സ്റ്റെല്ലാര്‍ യാത്രയിലൂടെ മനസിലാക്കിയെടുത്തു.
ബൈബിളിലെ തെരഞ്ഞെടുക്കപ്പെട്ട ചില ആശയങ്ങള്‍ കുട്ടികളില്‍ ഊട്ടിയുറപ്പിക്കുക എന്നതായിരുന്നു ഒരാഴ്ചത്തെ പരിശീലന പദ്ധതികൊണ്ട് ഉദേശിച്ചത്.
വിബിഎസ് ഹാളും പരിസരങ്ങളും സൂര്യചന്ദ്രന്മാരും നക്ഷത്രങ്ങളും ഗാലക്‌സിയുമൊക്കെയായി നല്ല രംഗപടങ്ങളാല്‍ അലങ്കരിച്ച് തികച്ചും ബഹിരാകാശതുല്യമായ ഒരു അന്തരീക്ഷം തങ്ങളുടെ ബൈബിള്‍ പഠനത്തിനായി ഒരുക്കിയിരുന്നു.
ഫിലഡല്‍ഫിയ സെെന്‍റ് തോമസ് സീറോ മലബാര്‍ ഫൊറോനാ ദേവാലയത്തിലെ മതബോധന സ്‌കൂള്‍ ഈ മാസം 14 മുതല്‍ 18 വരെ പ്രീകെ മുതല്‍ അഞ്ചാം ക്ലാസ് വരെയുള്ള കുട്ടികള്‍ക്കായി ആണ് ബൈബിള്‍ വെക്കേഷന്‍ ക്ലാസ് നടത്തിയത്.
കുട്ടികള്‍ സാധാരണ ഞായറാഴ്ചകളില്‍ വിശ്വാസപരിശീലനം നടത്തിയിരുന്ന ക്ലാസ് മുറികളും സോഷ്യല്‍ ഹാളും ലോബിയുമെല്ലാം തിരിച്ചറിയാന്‍ പറ്റാത്തരീതിയില്‍ ബഹുവര്‍ണ അലങ്കാരങ്ങളാല്‍ കമനീയമാക്കിയിരുന്നു.
ബൈബിളിലെ വിലയേറിയ മൊഴിമുത്തുകള്‍ കെത്തുന്നതിനുള്ള കുട്ടികളുടെ സ്റ്റെല്ലാര്‍ സ്‌പേസ് എക്‌സ്‌പെഡീഷനു തികച്ചും അനുചിതമായ രീതിയില്‍ സ്റ്റേജും ഹാളും സജമാക്കിയിരുന്നു. യുവജനങ്ങളുടെ ഭാവന നന്നായി ചിറകുവിടര്‍ത്തിയ അനുഭൂതി കാണികളില്‍ കുളിര്‍മയേകി.
മതബോധന സ്‌കൂള്‍ കുട്ടികള്‍ക്കായി നടത്തിയ അവധിക്കാല ബൈബിള്‍ പഠന പരിശീലന പരിപാടി പലതുകൊണ്ടും പുതുമ നിറഞ്ഞതായിരുന്നു.
രാവിലെ ഒൻപത് മുതല്‍ വൈകുന്നേരം അഞ്ച് വരെ നടത്തപ്പെട്ട പ്രോഗ്രാമില് ബൈബിളിലെ പ്രധാനപ്പെട്ട പല ആശയങ്ങളും കഥകളും ആക്ഷന്‍ സോംഗ്, കഥാകഥനം, സ്‌കിറ്റ്, പവര്‍ പോയിന്‍റ്, ആനിമേഷന്‍ വീഡിയോ, വിവിധയിനം ഗെയിമുകള്‍, പ്രെയിസ് ആന്‍റ് വര്‍ഷിപ്പ് എന്നിവയിലൂടെ കുട്ടികള്‍ക്കു മനസിലാകുന്ന രീതിയില്‍ രസകരമായി അവതരിപ്പിക്കാന്‍ സംഘാടകര്‍ പരമാവധി ശ്രദ്ധിച്ചു.
സിംഗ് ആന്‍റ് പ്ലേ ബ്ലാസ്റ്റ് ഓഫ്, സ്റ്റെല്ലാര്‍ ബൈബിള്‍ അഡ്വെഞ്ചേര്‍സ്, ഇമാജിനേഷന്‍ സ്റ്റേഷന്‍, ആള്‍ സ്റ്റാര്‍ ഗെയിംസ്, ഗാലക്ടിക് സ്‌നാക്‌സ്, കിഡ് വിഡ് മൂവീസ് എന്നിവയിലൂടെ കടന്ന് അഞ്ചാം ദിവസം കോസ്മിക് ക്ലോസിംഗ് നടത്തിയത് കുട്ടികള്‍ അറിഞ്ഞതേയില്ല.
ഗ്രേഡ് ലെവല്‍ അനുസരിച്ച് വിവിധ ഗ്രൂപ്പുകളിലായിട്ടാണു ക്ലാസ് നടന്നത്. ഇടവക വികാരി റവ. ഫാ. കുര്യാക്കോസ് കുന്പക്കീല്‍ അഞ്ചുദിവസം നീണ്ടുനിന്ന വെക്കേഷന്‍ ബൈബിള്‍ സ്‌കൂള്‍ ഉദ്ഘാടനം ചെയ്തു.
70ല് പരം കുട്ടികള്‍ ഈ വര്‍ഷത്തെ വിബിഎസില്‍ പങ്കെടുത്തു. ഫാ. കുര്യാക്കോസ് കുന്പക്കീല്‍, മതബോധന സ്‌കൂള്‍ പ്രിന്‍സിപ്പൽ ജേക്കബ് ചാക്കോ, വൈസ് പ്രിന്‍സിപ്പൽ ജോസ് മാളേയ്ക്കല്‍, മതാധ്യാപകര്‍, കൈക്കാരന്മാര്‍, സെക്രട്ടറി ടോം പാറ്റാനിയില്‍ എന്നിവരുടെ മേല്‍നോട്ടത്തില്‍
യുവജന നേതാക്കളായ ആശിഷ് തങ്കച്ചന്‍, ഫിയോണ കൊച്ചുമുട്ടം, ഏഞ്ജല്‍ പ്ലാമൂട്ടില്‍, ലിലി ചാക്കോ എന്നിവരാണ് ഈ വര്‍ഷത്തെ വിബിഎസ് പ്രോഗ്രാമിനു നേതൃത്വം നല്‍കിയത്. കഴിഞ്ഞ വര്‍ഷത്തെ കോര്‍ഡിനേറ്റേഴ്‌സ് ആയിരുന്ന കാതറീന്‍ സിമെന്തി, ബ്രിയാന കൊച്ചുമുട്ടം, അലിസ സിജി എന്നിവരും തങ്ങള്‍ ആര്‍ജിച്ച അറിവുകള്‍ ജൂനിയേഴ്‌സിനു പകര്‍ന്നു നൽകാനും സഹായത്തിനുമായി അവരോടൊപ്പമുണ്ടായിരുന്നു.
മതാധ്യാപകരായ ജാസ്മിന്‍ ചാക്കോ, മഞ്ജു ചാക്കോ, ജേക്കബ് ചാക്കോ, സീനിയേഴ്‌സായ അബിഗെയില്‍ ചാക്കോ, എമിലിന്‍ തോമസ് എന്നിവരും പിടിഎ വോളന്‍റിയേഴ്‌സും ഇടവകയിലെ യുവജനങ്ങളും കുട്ടികളുടെ മാതാപിതാക്കളും ഭക്ഷണമുള്‍പ്പെടെ പലവിധ പരിപാടികള്‍ കോര്‍ഡിനേറ്റ് ചെയ്തു.
വിജ്ഞാനപ്രദവും രസകരവുമായ ഈ ക്യാന്പ് കുറച്ചു ദിവസങ്ങള്‍കൂടി വേണ്ടിയിരുന്നു എന്നു പങ്കെടുത്ത പല കുട്ടികള്‍ക്കും തോന്നിപ്പിക്കാന്‍ ഇടയാക്കിയത് മികച്ച സംഘാടനത്തിന്‍റെ മേന്മയായി.
വെള്ളിയാഴ്ച വൈകുന്നേരം അഞ്ചുമുതല്‍ നടന്ന സമാപനപരിപാടികളില്‍ വികാരി റവ. ഫാ. കുര്യാക്കോസ് കുന്പക്കീല്‍, കൈക്കാരന്മാരായ റോഷിന്‍ പ്ലാമൂട്ടില്‍, രാജു പടയാറ്റില്‍, മതാധ്യാപകര്‍, മാതാപിതാക്കള്‍, യുവജനങ്ങള്‍, സുഹൃത്തുക്കള്‍ എന്നിവരും പങ്കെടുത്ത് കുട്ടികളുടെ ഗ്രാന്‍ഡ് ഫിനാലെ വന്‍ വിജയമാക്കി.
|