ലണ്ടൻ: ഇന്ത്യൻ ഓവർസീസ് കോൺഗ്രസിന്‍റെ നേതൃത്വത്തിൽ ലണ്ടനിൽ വച്ച് ബുധനാഴ്ച സംഘടിപ്പിക്കുന്ന "ഒസി ഒരോർമ''സമകാലീന ഭാരതം' സെമിനാറിൽ മുൻ ചീഫ് ജസ്റ്റീസ് ജേക്കബ് ബെഞ്ചമിൻ കോശി മുഖ്യാതിഥിയായി പങ്കെടുക്കും. വൈകുന്നേരം അഞ്ചിന് ആരംഭിക്കുന്ന യോഗനടപടികൾ ഏഴരയോടെ സമാപിക്കും.
സമകാലിക വിഷയങ്ങളിൽ തന്‍റെ പഠനത്തിലൂടെയും പ്രാക്ടീസിലൂടെയും അനുഭവങ്ങളിലൂടെയും ആർജിച്ചിട്ടുള്ള ജ്ഞാനവും അഭിപ്രായങ്ങളും ജെ.ബി. കോശി വേദിയിൽ പങ്കുവയ്ക്കും. അതോടൊപ്പം ന‌ടക്കുന്ന ഉമ്മൻ ചാണ്ടി അനുസ്മരണത്തിൽ അദ്ദേഹവുമായുള്ള തന്‍റെ ഔദ്യോഗികവും വ്യക്തിപരവുമായ ഓർമകൾ ജെ.ബി.കോശി പങ്കിടും.
ജെ.ബി.കോശി നടത്തുന്ന ഇന്ത്യൻ ഡയസ്‌പോറയുമായുള്ള സംഭാഷണത്തിൽ സാമൂഹിക, സാംസ്കാരിക, സാമുദായിക, രാഷ്ട്രീയ നേതാക്കൾ പങ്കെടുക്കും.
കാലഘട്ടത്തിലെ ഏറ്റവും വലിയ ജനോപകാരിയും മരണാനനന്തരവും കൂടുതൽ ശക്തനായി ജനമനസുകളിൽ ജീവിക്കുകയും ചെയ്യുന്ന ഉമ്മൻ ചാണ്ടിക്ക് വേണ്ടി മതരാഷ്ട്രീയ ഭേദഗതികളില്ലാതെ ലണ്ടനിൽ ഒരു അനുസ്മരണം സംഘടിപ്പിക്കുവാൻ ഐഒസി നാഷണൽ കമ്മിറ്റി മുന്നോട്ടു വരികയായിരുന്നു.
ഐഒസി നാഷണൽ പ്രസിഡന്‍റ് കമൽ ദലിവാലിന്‍റെ അധ്യക്ഷതയിൽ കൂടുന്ന യോഗത്തിൽ ഗുർമിന്ദർ രൺധാവ, വിക്രം ദുഹൻ, സുധാകർ ഗൗഡ അടക്കമുള്ള ദേശിയ നേതാക്കൾ സംസാരിക്കും.
ഗ്രേറ്റ് ബ്രിട്ടൻ സീറോ മലബാർ രൂപതയുടെ മീഡിയ സെൽ ചെയറും വികാരിയും പ്രഭാഷകനുമായ ഫാ. ടോമി എടാട്ട്, സെന്‍റ് ഗ്രിഗോറിയോസ് ഇന്ത്യൻ ഓർത്തഡോക്സ് ചർച്ച് വികാരി ഫാ.നിതിൻ പ്രസാദ് കോശി, ലണ്ടനിൽ ലൗട്ടനിലെ മുൻ മേയർ കൗൺസിലർ ഫിലിപ്പ് എബ്രഹാം, ഗമ്പാ വേണുഗോപാൽ, സുധാകർ ഗൗഡ്, എൻ.വി. എൽദോ(വെെഎംസിഎ ), വിദ്യാർഥി പ്രതിനിധി എഫ്രേം സാം, ഇമാം ഹഖ്, സ്റ്റീഫൻ റോയ്‌, ജോസ് ചക്കാലക്കൽ (WELKOM ), അൽക്ക ആർ തമ്പി തുടങ്ങിയവർ സംസാരിക്കും.
കേരള മനുഷ്യാവകാശ കമ്മീഷൻ അധ്യക്ഷൻ, പട്‌ന ഹൈക്കോടതി ചീഫ് ജസ്റ്റീസ്, കേരള ഹൈക്കോടതി ആക്ടിംഗ് ചീഫ് ജസ്റ്റീസ്, കേരള സ്റ്റേറ്റ് ലീഗൽ സർവീസസ് അതോറിറ്റിയുടെ എക്സിക്യൂട്ടീവ് ചെയർമാൻ എന്നീ നിലകളിൽ സേവനം ചെയ്തിട്ടുള്ള വ്യക്തിയാണ് ജെ.ബി. കോശി.
ടാറ്റ ടീ, ഹിന്ദുസ്ഥാൻ ലിവർ തുടങ്ങിയ നിരവധി കേന്ദ്ര/സംസ്ഥാന സർക്കാർ സ്ഥാപനങ്ങളുടെയും സ്വകാര്യ കമ്പനികളുടെയും സ്റ്റാൻഡിംഗ് കൗൺസലായി പ്രവർത്തിച്ചിട്ടുള്ള ജെ.ബി. കോശി പാറ്റ്ന ചാണക്യ നാഷണൽ ലോ യൂണിവേഴ്സിറ്റിയുടെ ചാൻസലറായും സേവനം ചെയ്തിട്ടുണ്ട്.
ഉമ്മൻ ചാണ്ടി അനുസ്മരണത്തിലും ജെ.ബി കോശിയുമായുള്ള സംവാദത്തിലും പങ്കു ചേരുവാൻ എല്ലാവരെയും ക്ഷണിക്കുന്നതാ‌യി ഐഒസിക്കു വേണ്ടി കോർഡിനേറ്റർ അജിത് മുതയിൽ അറിയിച്ചു.
വേദിയുടെ വിലാസം: The Church, Hinde Street Methodist Church 19 Hinde St, London, W1U 2QJ
|