ബെർലിൻ: ആഗോളതലത്തിൽ പ്രവാസിമലയാളികൾക്കായി വേൾഡ് മലയാളി കൗണ്സിൽ യൂറോപ്പ് റീജണ് ഒരുക്കിയ പ്രഥമ കലാസാംസ്കാരിക പരിപാടി പ്രൗഢഗംഭീരമായി. ഏപ്രിൽ 28 നു വൈകുന്നേരം നാലിന് വെർച്ചൽ പ്ളാറ്റ്ഫോമിലൂടെ ഒരുക്കിയ കലാസാംസ്കാരിക പരിപാടിയിൽ റീജണ് ചെയർമാൻ ജോളി തടത്തിൽ അധ്യക്ഷത വഹിച്ചു പ്രസംഗിച്ചു. വേൾഡ് മലയാളി കൗണ്സിൽ തുടക്കമിട്ട കലാസാംസ്കാരികവേദിയുടെ പ്രാധാന്യത്തെക്കുറിച്ചും, അതിന്റെ ലക്ഷ്യങ്ങളെക്കുറിച്ചും വിശദമായി പ്രതിപാദിച്ചു. ജെയിംസ് പാത്തിക്കൽ (വൈസ് പ്രസിഡന്റ് ജർമൻ പ്രൊവിൻസ്) പ്രാർഥനാഗാനം ആലപിച്ചു. റീജണ് പ്രസിഡന്റ് ജോളി എം. പടയാട്ടിൽ സ്വാഗതം ആശംസിച്ചു.
വേൾഡ് മലയാളി കൗണ്സിൽ ഗ്ലോബൽ പ്രസിഡന്റും, ധന്യഗ്രൂപ്പ് ഓഫ് കന്പനികളുടെ സിഇഒയും, നിരവധി കാരുണ്യ പ്രവർത്തനങ്ങൾക്കു നേതൃത്വം നൽകുന്ന ജോണ് മത്തായി ഉദ്ഘാടനം ചെയ്തു. ഡബ്ല്യുഎംസി ഗ്ലോബൽ ചെയർമാൻ ഗോപാലപിള്ള ഭദ്രദീപം തെളിച്ചു സന്ദേശം നൽകി. വെർച്വൽ പ്ളാറ്റ്ഫോമിൽ പങ്കെടുത്ത എല്ലാ പ്രവാസി മലയാളികളും സ്വസ്ഥാനങ്ങളിലിരുന്ന് ദീപം തെളിച്ച് സന്ദേശം ഏറ്റുവാങ്ങി. വേൾഡ് മലയാളി കൗണ്സിൽ ഗ്ലോബൽ വൈസ് ചെയർമാനും, കലാസാംസ്കാരികരംഗത്തു തനതായ വ്യക്തിമുദ്ര പതിപ്പിച്ച ഗ്രിഗറി മേടയിൽ (ജർമനി) കലാസാംസ്കാരികവേദി മോഡറേറ്റു ചെയ്തു. ഗ്ലോബൽ ചെയർമാൻ ഗോപാലപിള്ള,യൂറോപ്പ് റീജണ് സെക്രട്ടറി ബാബു തോട്ടപ്പള്ളി എന്നിവർ ആശംസകൾ നേർന്നു.
പരിപാടിയിൽ പ്രത്യേക അഥിതികളായി എത്തിയ കൊച്ചിൻ ഇന്റർനാഷണൽ എയർപോർട്ട് ഡയറക്ടർ മനുവും, പബ്ലിക് റിലേഷൻ ഓഫീസർ ജയനും എയർപോർട്ടിൽ പ്രവർത്തിക്കുന്ന അത്യാഹിത വിഭാഗത്തേയും, അവരുടെ സേവനം യാത്രക്കാർക്ക് എങ്ങനെ ലഭ്യമാക്കാം എന്നതിനെക്കുറിച്ചും വിശദമായി സംസാരിച്ചു.
വേൾഡ് മലയാളി കൗണ്സിൽ ജർമൻ പ്രൊവിൻസ് പ്രസിഡന്റ് ജോസ് കുന്പിളുവേലിൽ, വേൾഡ് മലയാളി കൗണ്സിൽ ഡോക്ടേഴ്സ് ഫോറം പ്രസിഡന്റ് ഡോ. ജിമ്മി മൊയ്ലാൻ, ഗ്ളോബൽ വൈസ് പ്രസിഡന്റ് തോമസ് അറന്പൻകുടി, വേൾഡ് മലയളി കൗണ്സിൽ എൻആർകെ ഫോറം പ്രസിഡന്റ് അബ്ദുൾ ഹക്കിം, മാധ്യമപ്രവർത്തകനും, പ്രമുഖ സാഹിത്യകാരനും, എഴുത്തുകാരനുമായ കാരൂർ സോമൻ തുടങ്ങിയവർ അഭിലാഷ് എന്ന യുവാവിന്റെ മരണത്തെക്കുറിച്ചുള്ള ചർച്ചയിൽ പങ്കെടുത്തു സിയാലിന്റെ പ്രവർത്തനക്ഷമത വീണ്ടും വിപൂലീകരിക്കണമെന്നു ചൂണ്ടിക്കാട്ടി സംസാരിച്ചു.
പ്രമുഖ എഴുത്തുകാരിയും, വാഗ്മിയും, അക്ഷരി ഫൗണ്ടേഷൻ സിഇഒയും, വേൾഡ് മലയാളി കൗണ്സിൽ ഗ്ലോബൽ വിമൻസ് ഫോം പ്രസിഡന്റുമായ പ്രഫസർ ഡോ.ലളിത മാത്യു കലാസാംസ്കാരിക വേദിയിൽ കവിതയുടെ പ്രാധാന്യത്തെക്കുറിച്ചു ഹ്രസ്വമായി പ്രതിപാദിച്ചുകൊണ്ടു താനെഴുതിയ ഉറങ്ങട്ടെ മുത്തശ്ശി എന്ന കവിത അവതരിപ്പിച്ചു.
രാജു കുന്നക്കാട്ട് (അയർലണ്ട് പ്രൊവിൻസ്) അവതരിപ്പിച്ച ഗഫൂർക്ക ദോസ്ത് എന്ന കവിതയും, ജോണ്സണ്, ആൻസി തലച്ചെല്ലൂർ (പ്രസിഡന്റ്, വേൾഡ് മലയാളി കൗണ്സിൽ അമേരിക്ക റീജിയൻ) അവതരിപ്പിച്ച യുഗ്മ ഗാനവും, ഷൈബു ജോസഫ് കട്ടിക്കാട്ടിന്റെ ഗാനവും, ഗായകനും, കലാകാരനുമായ സോബിച്ചൻ ചേന്നങ്കരയുടെ ഗാനങ്ങളും, ഈ കലാസാംസ്ക്കാരികവേദിയെ പ്രൗഡഗംഭീരമാക്കി.
യൂറോപ്പ് റീജൺ ട്രഷറർ ഷൈബു ജോസഫ് കട്ടിക്കാട്ട് കൃതജ്ഞത പറഞ്ഞു. ലോകത്തിന്റെ വിവിധഭാഗങ്ങളിലായി കഴിയുന്ന മലയാളികൾക്കായി എല്ലാ മാസത്തിന്േറയും അവസാനത്തെ വെള്ളിയാഴ്ച വേൾഡ് മലയാളി കൗണ്സിൽ യൂറോപ്പ് റീജിയൻ ഒരുക്കുന്ന കലാസാംസ്കാരികവേദിയുടെ അടുത്ത സമ്മേളനം മേയ് 26 ഉച്ചകഴിഞ്ഞു മൂന്നുമണിക്കു (യുകെ ടൈം) വേർച്ചൽ പ്ളാറ്റ്ഫോമിലൂടെ നടക്കും.
ഈ കലാസാംസ്കാരികവേദിയിൽ എല്ലാ പ്രവാസി മലയാളികൾക്കും അവർ താമസിക്കുന്ന രാജ്യങ്ങളിൽ നിന്നു കൊണ്ടുതന്നെ ഇതിൽ പങ്കെടുക്കുവാനും, അവരുടെ കലാസൃഷ്ടികൾ അവതരിപ്പിക്കുവാനും, (കവിതകൾ, ഗാനങ്ങൾ തുടങ്ങിയവ ആലപിക്കുവാനും) ആശയവിനിമയങ്ങൾ നടത്തുവാനും അവസരം ഉണ്ടായിരിക്കും. പ്രവാസി മലയാളികൾക്കിടയിൽ ഇദംപദമായി ആരംഭിച്ച കലാസാംസ്കാരിക വേദിയിൽ പ്രവാസികൾ അഭിമുഖീകരിക്കുന്ന സമകാലിക വിഷയങ്ങളെക്കുറിച്ചു സംവദിക്കാനും അവസരം ഉണ്ടായിരിക്കും.
|