അബുദാബി: മലയാളിയുടെ ഗൃഹാതുര ഓർമ്മകളുടെ തിരശീല നീക്കി നാടകവസന്തത്തിനു അബുദാബി കേരള സോഷ്യൽ സെന്‍റർ അങ്കണം വീണ്ടും വേദിയാകുന്നു. മഹാമാരിയുടെ പിടിയിലമർന്ന രണ്ടു വർഷങ്ങൾക്ക് ശേഷമാണ് നാടകപ്രേമികളുടെ ഹൃദയവികാരത്തിന് രംഗപടം ഒരുങ്ങുന്നത്.
കഐസ്‌സി സംഘടിപ്പിക്കുന്ന പതിനൊന്നാമത് ഭരത് മുരളി നാടകോത്സവമാണ് 13 മുതൽ 31 വരെ സെന്‍റർ ഓഡിറ്റോറിയത്തിൽ അരങ്ങേറുക. ഉദ്ഘാടനം 13ന് രാത്രി 8ന് നടക്കും. പൗരാണികതയും ,ആധുനികതയും സമ്മേളിക്കുന്ന എട്ട് നാടകങ്ങളാണ് മത്സരത്തിൽ പങ്കെടുക്കുന്നത്.
പ്രവേശനം പാസ് മൂലം നിയന്ത്രിക്കുമെന്ന് സംഘാടകർ അറിയിച്ചു. ഫലപ്രഖ്യാപനവും സമ്മാനദാനവും 31ന് നടക്കും. ജേതാക്കൾക്ക് 15,000 ദിർഹം ആണ് സമ്മാനം. രണ്ട്, മൂന്ന് സ്ഥാനക്കാർക്ക് 10,000, 5,000 ദിർഹം വീതം ലഭിക്കും. മികച്ച സംവിധായകൻ, നടൻ, നടി എന്നിവർക്ക് 2000 ദിർഹം വീതമാണ് സമ്മാനം. മികച്ച ബാല താരത്തിന് 500 ദിർഹമും. സമ്മാനിക്കുമെന്ന് കെ എസ്‌സി പ്രസിഡന്‍റ് വി.പി കൃഷ്ണകുമാർ വാർത്താസമ്മേളനത്തിൽ പറഞ്ഞു.
വി.എസ് തന്പി (ലുലു എക്സ്ചേഞ്ച്), സൂരജ് പ്രഭാകർ (അഹല്യ മെഡിക്കൽ ഗ്രൂപ്പ്), കെ എസ് സി സെക്രട്ടറി ഷെറീൻ വിജയൻ, ആർട്സ് സെക്രട്ടറി നിഷാം വെള്ളുത്തടത്തിൽ എന്നിവരും പങ്കെടുത്തു.
നാടകങ്ങളും ,അവതരണ തീയതിയും.
ജനുവരി 14
നവ രാഷ്ട്ര (രചന/സംവിധാനം: പ്രശാന്ത് നാരായണൻ, അവതരണം: ഐഎസ്‌സി അജ്മാൻ)
ജനുവരി 15
ലങ്കാലക്ഷ്മി (രചന: സി.എൻ. ശ്രീകണ്ഠൻ നായർ, സംവിധാനം: എമിൽ മാധവി, അവതരണം: ചമയം തിയറ്റർ ഷാർജ)
ജനുവരി 20
റാണി ബിജിലി ലാജ്ജോ (രചന: ഒ.ടി. ഷാജഹാൻഅനൂപ് രത്ന, സംവിധാനം: ഒ.ടി ഷാജഹാൻ, അവതരണം: ഓർമ ദുബായ്)
ജനുവരി 21
ദ്വയം (രചന: ശ്രീജിത്ത് പൊയിൽക്കാവ്, സംവിധാനം: അജയ് അന്നൂർ, അവതരണം: അൽഖൂസ് തിയറ്റർ)
ജനുവരി 26
സ്റ്റേജ് (രചന/സംവിധാനം: ജിനോ ജോസഫ്, അവതരണം: കല അബുദാബി)
ജനുവരി 28
കക്കുകളി (രചന: കെ.ബി. അജയകുമാർ, സംവിധാനം: ജോബ് മഠത്തിൽ, അവതരണം: ശക്തി തിയറ്റേഴ്സ് അബുദാബി)
ജനുവരി 29
മാക്ബത് (രചന: ഷേക്സ്പിയർ, രൂപകൽപനസംവിധാനം: സുവീരൻ, അവതരണം: ക്രീയേറ്റീവ് ക്ലൗഡ് അൽഐൻ)
ജനുവരി 30
കവചിതം (മൂലകഥ: സോക്രട്ടീസ് കെ വാലത്ത്, രചന/സംവിധാനം: നിഖിൽ ദാസ്, അവതരണം: അൽഐൻ മലയാളി സമാജം)
|