അബുദാബി: ഇന്ത്യാ സോഷ്യൽ ആൻഡ് കൾച്ചറൽ സെന്‍ററും, ഐഎസ്.സി എന്‍റർപ്രണേഴ്സ് ആൻഡ് പ്രഫഷണൽ ഫോറവും (ഐപിഇഎഫ്) ചേർന്ന് നവംബർ 10 വ്യാഴാഴ്ച നിർമാണ മേഖലയിലെ വ്യവസായ പ്രമുഖർ, മനുഷ്യവിഭവശേഷി പരിശീലന വകുപ്പുകളിലെ ഉന്നതരും ഉൾപ്പെടുന്ന വലിയൊരു സദസിന്‍റെ സാന്നിധ്യത്തിൽ കണ്‍സ്ട്രക്ഷൻ ലീഡേഴ്സ് കണക്റ്റിവിറ്റി മീറ്റ് സംഘടിപ്പിച്ചു.
കണ്‍സ്ട്രക്ഷൻ സ്കിൽ ഡെവലപ്മെന്‍റ് കൗണ്‍സിൽ ഓഫ് ഇന്ത്യ (സിഎസ്ഡിസിഐ) ചീഫ് എക്സിക്യൂട്ടീവ് ഓഫീസർ നരേന്ദ്ര ദേശ്പാണ്ഡെ മുഖ്യപ്രഭാഷണം നടത്തുകയും നിർമാണ മേഖലയിലെ നേതാക്കളുമായും മാനവശേഷി ഏജൻസികളുമായും പ്രധാന ഉദ്യോഗസ്ഥരുമായും ആശയവിനിമയം നടത്തുകയും ചെയ്തു. സ്കിൽ ഇന്ത്യ മിഷന്‍റെ ലക്ഷ്യങ്ങളും ചട്ടക്കൂടും യുഎഇയിലെ ബിസിനസുകൾക്ക് എങ്ങനെ പ്രയോജനം ചെയ്യാമെന്നും നരേന്ദ്ര ദേശ്പാണ്ഡെ വിശദീകരിച്ചു.
ഇക്വിലിബ്രിയം എഞ്ചിനീയറിംഗ് കണ്‍സൾട്ടൻസി, ജർമൻ ഗൾഫ് കോണ്ട്രാക്റ്റിംഗ്, ടെക്നിമോണ്ട്, ആൽട്രാഡ് ഗ്രൂപ്പ് ഓഫ് കന്പനീസ്, വീനസ് ഇൻഫ്രാസ്ട്രക്ചർ, നിസ്കോഎന്നിവയുൾപ്പെടെ 14 കന്പനികൾ അവരുടെ വരാനിരിക്കുന്ന പ്രോജക്ടുകളിൽ സിഎസ്.ഡിസിഐയുടെ സേവനങ്ങളിൽ ഏർപ്പെടുന്നതിനായി താൽപ്പര്യപത്ര കരാറിൽ ഒപ്പുവച്ചു. ബിഐഎം സോഫ്റ്റ്വെയർ കന്പനിയായ ബെക്സൽ മാനേജറാണ് ഇവന്‍റ് സ്പോണ്സർ ചെയ്തത്, മീറ്റ് സംഘടിപ്പിച്ചത് ദി എൻകോർ ഇവന്‍റ്സ് അബുദാബിയാണ്.
ലാഭേച്ഛയില്ലാത്ത സ്ഥാപനമായ കണ്‍സ്ട്രക്ഷൻ സ്കിൽ ഡെവലപ്മെന്‍റ് കൗണ്‍സിൽ ഓഫ് ഇന്ത്യ സഹകരിച്ചാണ് പരിപാടി സംഘടിപ്പിച്ചത്. നൈപുണ്യ വികസനം പ്രോത്സാഹിപ്പിക്കുന്നതിനായി ഇന്ത്യയിലെ പൊതുസ്വകാര്യ പങ്കാളിത്ത സ്ഥാപനമായ നാഷണൽ സ്കിൽ ഡെവലപ്മെന്‍റ് കോർപ്പറേഷന്റെ (എൻഎസ്ഡിസി) ഉത്തരവിന് കീഴിലാണ് സെക്ടർ സ്കിൽ കൗണ്‍സിൽ രൂപീകരിച്ചിരിക്കുന്നത്.
കണ്‍സ്ട്രക്ഷൻ സ്കിൽ ഡെവലപ്മെന്‍റ് കൗണ്‍സിൽ ഓഫ് ഇന്ത്യയുടെ ലക്ഷ്യംവയ്ക്കുന്നത് യുവാക്കളുടെ പരിശീലനവും വൈദഗ്ധ്യവും ഉന്നമനവും ഇന്ത്യൻ സർക്കാർ പ്രോത്സാഹിപ്പിക്കുകയും പ്രത്യേക വൈദഗ്ധ്യവുമായി ബന്ധപ്പെട്ട മാനദണ്ഡങ്ങൾക്കനുസൃതമായി അവരെ വിലയിരുത്തുകയും സാക്ഷ്യപ്പെടുത്തുകയും ചെയ്യുന്നു, അതുവഴി അവർക്ക് ഇന്ത്യയിലും വിദേശത്തും മികച്ച തൊഴിലവസരങ്ങൾ ലഭിക്കും.
ഐഎസ്‌സി ജനറൽ ഗവർണർ ഗണേഷ് ബാബു (ജെമിനി ബിൽഡിംഗ് മെറ്റീരിയൽസ്), ഐഎസ്‌സി പ്രഫഷണൽ ആൻഡ് എന്‍റർപ്രണേഴ്സ് ഫോറം (ഐപിഇഎഫ്) ചെയർമാൻ ഷാജി വി.കെ എന്നിവരുടെ സാന്നിധ്യത്തിൽ ഇന്ത്യൻ സോഷ്യൽ ആൻഡ് കൾച്ചറൽ സെന്‍റർ പ്രസിഡന്‍റ് ഡി. നടരാജൻ മുഖ്യാതിഥിയെ ആദരിച്ചു. ഐഎസ്‌സി എന്‍റർപ്രണേഴ്സ് ആൻഡ് പ്രഫഷണൽ ഫോറം ട്രഷറർ റെജി ഉലഹന്നാൻ അതിഥികളെ സ്വാഗതം ചെയ്തു. അജിത് വടക്കൂട്ട് (സിഎസ്ഡിസിഐ എൻ.ഒ.എസ് അംഗം), സന്തോഷ് മൂർക്കോത്ത് (ഐ.എസ്.സി വൈസ് പ്രസിഡന്‍റ്), ലിംസണ്‍ ജേക്കബ് (ഐ.എസ്.സി ട്രഷറർ), റെനി തോമസ് (ആക്ടിംഗ് ജനറൽ സെക്രട്ടറി) തുടങ്ങി പ്രമുഖ നിർമാണ കന്പനി ഉന്നതതല ഉദ്യോഗസ്ഥരും, സാങ്കേതിക കണ്‍സൾട്ടന്‍റുമാർ, വിഷയ വിദഗ്ധർ, കണ്‍സ്ട്രക്ഷൻ മാനേജ്മെന്‍റ് പേഴ്സണൽ എന്നിവരും പങ്കെടുത്തു.
യുഎഇയിൽ സിഎസ്ഡിസിയുടെ സേവനങ്ങൾ ആവശ്യമുള്ളവർക്കു ഐപിഇഎഫ്. അധ്യക്ഷൻ ഷാജി വി. കെ., സിഎസ്ഡിസി.എൻഒ. എസ്. അംഗം അജിത് വടക്കൂട്ടു എന്നിവരുമായി ബന്ധപ്പെടാവുന്നതാണ്.
|