അബുദാബി: സമാധാന സംരക്ഷണവും സൗഹൃദവുമാണ് പ്രധാന പ്രവർത്തന അജണ്ടയെന്ന് മുസ്ലിംലീഗ് സംസ്ഥാന പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങൾ വ്യക്തമാക്കി. അബുദാബി കെ എംസിസി സംസ്ഥാന കമ്മിറ്റി സംഘടിപ്പിച്ച സൗഹൃദ സമ്മേളനത്തിൽ മുഖ്യാഥിതിയായി പങ്കെടുത്തു സംസാരിക്കുകയായിരുന്നു അദ്ദേഹം. വിദ്വേഷമല്ല , സ്നേഹവും സാഹോദര്യവും പരസ്പര വിശ്വാസവുമുള്ള പ്രവർത്തനരീതിയാണ് സമൂഹത്തിന് അഭികാമ്യം. മനുഷ്യത്വവും സ്നേഹ സന്പന്നതയും നഷ്ടപ്പെടുന്നതാണ് കാലഘട്ടം നേരിടുന്ന ദൗർഭാഗ്യമെന്ന് അദ്ദേഹം കൂട്ടിച്ചേർത്തു.
സമാധാനത്തിന്റെയും ശാന്തിയുടെയും പാതയിൽനിന്നും പിറകോട്ട് സഞ്ചരിക്കുന്ന സാഹചര്യം ഉണ്ടാവില്ലെന്ന് ചടങ്ങിൽ പങ്കെടുത്ത മുസ്ലിംലീഗ് ദേശീയ സെക്രട്ടറി പി.കെ. കുഞ്ഞാലിക്കുട്ടി വ്യക്തമാക്കി.
പ്രസിഡന്റ് ഷുക്കൂറലി കല്ലുങ്ങൽ അധ്യക്ഷത വഹിച്ചു. കെ എംസിസി നാഷണൽ കമ്മിറ്റി പ്രസിഡന്റ് പുത്തൂർ റഹ്മാൻ, ജനറൽ സെക്രട്ടറി അൻവർ നഹ, വർക്കിംഗ പ്രസിഡന്റ് യു. അബ്ദുല്ല ഫാറൂഖി, സ്വാമി ആത്മദാസ് യമി, ഫാ. എൽദോ എം പോൾ, ഫാ. ജിജോ ജോസഫ്, പ്രൊഫ. ഗോപിനാഥ് മുതുകാട്, ഷാജഹാൻ മാടന്പാട്ട്, അബ്ദുൽഹക്കീം ഫൈസി, ഹുസൈൻ സലഫി, സേവനം പ്രതിനിധി രാജൻ അന്പലത്തറ, എംപിഎം റഷീദ്, ടികെ അബ്ദുൽസലാം, സിംസാറുൽ ഹഖ് ഹുദവി, വിഗ്നേഷ് അങ്ങാടിപ്പുറം, ജനറൽ സെക്രട്ടറി അഡ്വ. കെവി മുഹമ്മദ്കുഞ്ഞി , ട്രഷറർ പികെ അഹമ്മദ് ബല്ലാകടപ്പുറം എന്നിവർ സംസാരിച്ചു.
|