ഹൂസ്റ്റണ്‍: കേരള ഹിന്ദൂസ് ഓഫ് നോർത്ത് അമേരിക്കയുടെ മുഖപത്രമായ അഞ്ജലിയുടെ ഓണപ്പതിപ്പ് സംവിധായകൻ അടൂർ ഗോപാലകൃഷ്ണൻ പ്രകാശനം ചെയ്തു. തിരുവോണ ദിവസം തിരുവനന്തപുരത്ത് നടക്കുന്ന ചടങ്ങിൽ സൂര്യാ കൃഷ്ണമൂർത്തിക്ക് ആദ്യകോപ്പി ഏറ്റുവാങ്ങി. കഐച്ച്എൻഎ കണ്‍വൻഷൻ ചെയർമാൻ രഞ്ജിത് പിള്ള , ഗുരുവായൂർ ദേവസ്വം ബോർഡ് മുൻ അംഗം ജി. മധുസൂദനൻപിള്ള , പൂർണിമ പിള്ള തുടങ്ങിയവർ പങ്കെടുത്തു. അക്കിത്തം, സുഗതകുമാരി, സി. രാധാകൃഷ്ണൻ തുടങ്ങിയ പ്രമുഖരുടെ രചനകൾക്കൊപ്പം അമേരിക്കയിൽ പ്രവാസ ജിവിതം നയിക്കുന്നവരുടെ എഴുത്തുകളും ഓണപ്പതിപ്പിലുണ്ട്.
കേരളം വിട്ട് അമേരിക്കയിലും കാനഡയിലും ജീവിക്കുന്ന എല്ലാ കെഎച്ച്എൻഎ കുടുംബാംഗങ്ങൾക്കും നടൻ മോഹൻലാൽ ഓണാശംസ നേർന്നുകൊണ്ടുള്ള സന്ദേശവും മാസികയിൽ ചേർത്തിട്ടുണ്ട്. തിരുവിതാംകൂർ രാജകുടുംബത്തിലെ അശ്വതി തിരുനാൾ ഗൗരി ലക്ഷ്മി ബായി അഭിമുഖത്തിലൂടെ ഓണ വിശേഷം പങ്കിടുന്നുണ്ട്. കഐച്ച്എൻഎ ഭാരവാഹികളായ ജി.കെ പിള്ള, ഡോ രാംദാസ് പിള്ള, സോമരാജൻ നായർ, സുരേഷ് നായർ, ബാഹുലേയൻ രാഘവൻ, മാധവൻ ബി നായർ എന്നിവരുടെ സന്ദേശങ്ങളും സംഘടന റിപ്പോർട്ടും അഞ്ജലിയിൽ ചേർത്തിട്ടുണ്ട്.
രാധാകൃഷ്ണൻ നായർ ചീഫ് എഡിറ്ററും ജി.കെ പിള്ള, പ്രസന്നൻ പിള്ള, വിനോദ് വാസുദേവൻ, ജയപ്രകാശ് നായർ, രഞ്ജിത് പിള്ള, ഡോ സുധീർ പ്രയാഗ, ബാഹുലേയൻ രാഘവൻ, രവി വള്ളത്തേരി, ഡോണ മയൂര, വനജ നായർ, ഡോ രവി രാഘവൻ, ഡോ ബിജുപിള്ള, ഡോ നാരായണൻ നെയ്ത്തലത്ത്, പി. ശ്രീകുമാർ എന്നിവർ അംഗങ്ങളുമായ പത്രാധിപ സമിതിയാണ് അഞ്ജലി തയാറാക്കിയിരിക്കുന്നത്
|