റിയാദ്: റിയാദ് നവോദയ കേന്ദ്രകമ്മിറ്റി അംഗവും സ്പോർട്സ് കമ്മിറ്റി കണ്വീനറുമായ ജയജിത്തിനും നവോദയ കുടുംബവേദി ചെയർപേഴ്സനും ജീവകാരുണ്യപ്രവർത്തകയുമായ പ്രതീന ജയജിത്തിനും യാത്രയയപ്പു നൽകി.
റിയാദ് കിംഗ് ഫഹദ് മെഡിക്കൽ സിറ്റിയിൽ 2008 മുതൽ സ്റ്റാഫ് നഴ്സായി പ്രവർത്തിച്ചിരുന്ന പ്രതീന പൊതുവിലും കൊറോണകാലത്ത് പ്രത്യേകിച്ചും ആരോഗ്യമേഖലയിൽ നിരവധി ജീവകാരുണ്യ പ്രവർത്തനങ്ങൾ നടത്തി വിവിധ സംഘടനകളുടെ ആദരവുകൾ ഏറ്റുവാങ്ങിയിരുന്നു. നവോദയയുടെ ജീവകാരുണ്യ പുരസ്കാരവും പ്രതീന നേടിയിട്ടുണ്ട്. പ്രശസ്ത നാടക സംവിധായകൻ ജയൻ തിരുമനയുടെ സംവിധാനത്തിൽ നവോദയ വാർഷികദിനത്തിൽ അവതരിപ്പിച്ച തീപ്പൊട്ടൻ എന്ന നാടകത്തിലും ശ്രദ്ധേയമായ ഒരു വേഷം പ്രതീന ചെയ്തിരുന്നു. റിയാദ് അൽജസീറ കന്പനിയിൽ മെക്കാനിക്കായി ജോലി ചെയ്യുന്ന ജയജിത്ത് നവോദയയുടെ നേതൃനിരയിൽ സജീവ സാന്നിധ്യവും സംഘടനയുടെ കായിക പരിപാടികളുടെ മുഖ്യസംഘാടകരിൽ ഒരാളുമായിരുന്നു. ഇരുവരുടെയും മക്കൾ രുദ്രയും (+1 വിദ്യാർത്ഥി), അമർ ജിത്തും (6 ആം ക്ലാസ് വിദ്യാർഥി) റിയാദിലുണ്ടായിരുന്നു. ആലപ്പുഴ, വള്ളിക്കുന്നം സ്വദേശികളാണ്.
യാത്രയയപ്പു യോഗം നവോദയ സെക്രട്ടറി രവീന്ദ്രൻ പയ്യന്നൂർ ഉദ്ഘാടനം ചെയ്തു. ബാബുജി, അനിൽ മണന്പൂര്, പൂക്കോയ തങ്ങൾ, കുമ്മിൾ സുധീർ, ഹാരിസ്, ഷാജു പത്തനാപുരം, ആതിര ഗോപൻ, അഞ്ജു ഷാജു, സൗമ്യ ശ്രീരാജ്, അനിൽ പിരപ്പൻകോട്, നിസാർ അഹമ്മദ്, ശ്രീരാജ്, അബ്ദുൽ കലാം, ഷൈജു ചെന്പൂര്, ഹാരിസ് എന്നിവർ ആശംസകൾ നേർന്നു. ലളിതാംബിക ആധ്യക്ഷം വഹിച്ചു, അഞ്ജു ഷാജു സ്വാഗതം പറഞ്ഞു. ജയജിത്തും പ്രതീനയും മറുപടി പ്രസംഗം നടത്തി. നവോദയ കേന്ദ്ര കമ്മിറ്റിയുടെ ഉപഹാരം സെക്രട്ടറി രവീന്ദ്രനും, ഗിഫ്റ്റ് പൂക്കോയ തങ്ങളും കുടുംബവേദിയുടെ ഉപഹാരം ആതിര ഗോപനും, ബത്ത യൂണിറ്റിന്റെ ഉപഹാരം അബ്ദുൽ കലാമും അസീസിയ യൂണിറ്റിന്റെ ഗിഫ്റ്റ് അനിൽ പിരപ്പൻകോടും കൈമാറി. വിവിധ കമ്മിറ്റി അംഗങ്ങളും സന്നിഹിതരായിരുന്നു. തുടർന്ന് റിയാദ് മ്യൂസിക് ക്ലബ് അംഗങ്ങൾ നടത്തിയ ഗാനമേളയും പരിപാടിയുടെ ഭാഗമായി അരങ്ങേറി.
|