• Logo

Allied Publications

Americas
ബസ് തട്ടിയെടുത്ത് രക്ഷപെട്ട കൊലക്കേസ് പ്രതിക്കുവേണ്ടി പോലീസ് തിരച്ചിൽ തുടരുന്നു
Share
സെന്‍റർവില്ല(ടെക്സസ്): ജയിലിലെ ബസ് ഡ്രൈവറെ കുത്തി പരിക്കേൽപിച്ചശേഷം ബസുമായി രക്ഷപെട്ട കൊലക്കേസ് പ്രതി ഗോൺസാലോ ലോപ്സി (46) നെ കണ്ടെത്തുന്നതിനു മൂന്നാഴ്ചയായി പോലീസ് നടത്തുന്ന ശ്രമങ്ങളൊന്നും ഇതുവരെയും വിജയിച്ചിട്ടില്ല.

മേയ് 12 നായിരുന്നു സംഭവം. ജയിലിൽനിന്നും പുറത്തേയ്ക്കു ബസിൽ പ്രതിയെ കൊണ്ടുപോകവേ, ബസ് ഡ്രൈവറായിരുന്ന ഓഫീസറെ കുത്തിപ്പരിക്കേൽപ്പിച്ചു ബസുമായി രക്ഷപെടുകയായിരുന്നു. ഇതിനിടയിൽ ബസിന്‍റെ ടയർ പൊട്ടിയതിനെതുടർന്നു ബസ് ഉപേക്ഷിച്ചു മരങ്ങൾ തിങ്ങിനിറഞ്ഞു നിൽക്കുന്ന പ്രദേശത്തേയ്ക്ക് ഓടി രക്ഷപെടുകയായിരുന്നു. ഏക്കറോളം വ്യാപിച്ചു കിടക്കുന്ന ഈ പ്രദേശത്തു പോലീസ് വ്യാപകമായ രീതിയിൽ തിരച്ചിൽ നടത്തിയെങ്കിലും പ്രതിയെ കണ്ടെത്താനായില്ല. ഇവിടെ നിന്നും പ്രതി രക്ഷപെട്ടിരിക്കാം എന്നാണ് പോലീസ് കരുതുന്നത്.

പ്രതിയെ കണ്ടെത്തുന്നതിനായി പോലീസ് പ്രതിയുടെ കൂടുതൽ വിവരങ്ങൾ പുറത്തുവിട്ടു. ശരീരത്തിൽ മുഴുവൻ ടാറ്റു ചെയ്ത ചിത്രം പരസ്യപ്പെടുത്തിയിട്ടുണ്ട്. പ്രതിയെ കണ്ടെത്താൻ സഹായിക്കുന്നവർക്ക് 50,000 ഡോളർ പ്രതിഫലവും പോലീസ് പ്രഖ്യാപിച്ചിട്ടുണ്ട്. ഹിഡാൽഗോ കണ്ടി ജയിലിൽ കോലപാതക കേസിൽ ജീവപര്യന്തം തടവുശിക്ഷ അനുഭവിച്ചുവരുന്നതിനിടയിലാണ് പ്രതി ബസ് ഡ്രൈവറെ കുത്തി പരിക്കേൽപ്പിച്ചു രക്ഷപെടുന്നത്.