ഫിലഡൽഫിയ: സംഘടകളുടെ കൂട്ടായ്മയായ ട്രൈസ്റ്റേറ്റ് കേരള ഫോറവും ഫിലഡൽഫിയയിലെ ആദ്യകാല സംഘടനയായ മാപ്പ് അസോസിയേഷനും ഒന്നിച്ചു പ്രവർത്തിക്കാൻ തീരുമാനമായതായി ട്രൈസ്റ്റേറ്റ് കേരള ഫോറം ചെയർമാൻ സുമോദ് റ്റി. നെല്ലിക്കാല അറിയിച്ചു.
സഹോദര്യത്തിന്റെ നാടായ ഫിലഡൽഫിയായിൽ സംഘടനകൾ ഒത്തൊരുമിച്ചു പ്രവർത്തിക്കാനുള്ള തീരുമാനം ഒരു മാറ്റത്തിന്റെ ശുഭ പ്രതീക്ഷയാണ് നൽകുന്നതെന്ന് അദ്ദേഹം കൂട്ടിച്ചേർത്തു.
മാപ്പ് പ്രസിഡന്റ് ശാലു പുന്നൂസ് അദ്ദേഹത്തിന്റെ ഭരണ കാലത്തു കൈക്കൊണ്ട ധീരമായ നടപടിയാണ് ഇതര സംഘടനകളുമായി കൈ കോർത്ത് പ്രവർത്തിക്കാൻ ഉണ്ടായ തീരുമാനം. നിയുക്ത പ്രസിഡന്റ് തോമസ് ചാണ്ടി തീരുമാനത്തെ സ്വാഗതം ചെയ്തിട്ടുണ്ട്.
ഇരു സംഘടകളുടേയും നിലവിലെ ഭരണ സമിതി ഉൾപ്പെടെ മുൻകാല നേതാക്കന്മാരുടെയും കൂട്ടായ ശ്രമഫലമാണ് ഇരു സംഘടനകളുടെയും കൂട്ടായ പ്രവർത്തനത്തിനു വഴി തെളിച്ചതെന്നും എല്ലാവരുടെയും ഒത്തൊരുമ മനോഭാവത്തിനും ദീർഘവീക്ഷണത്തിനും പ്രത്യേകം നന്ദി പറയുന്നതായും സുമോദ് നെല്ലിക്കാല പറഞ്ഞു.
സാജൻ വർഗീസ്, രാജൻ സാമുവൽ, വിൻസെന്റ് ഇമ്മാനുവേൽ, അലക്സ് തോമസ്, ഫിലിപ്പോസ ചെറിയാൻ, ജോബി ജോർജ്, ജോർജ് ഓലിക്കൽ, ജീമോൻ ജോർജ്, സുധ കർത്താ, കുര്യൻ രാജൻ, റോണി വർഗീസ്, സുരേഷ് നായർ, ജോൺ സാമുവേൽ എന്നിവർ ഉൾപ്പെടെ മറ്റു സഹോദര സംഘടനാ നേതാക്കളും അഭിനന്ദനം അറിയിച്ചിട്ടുണ്ട്.
മാപ്പ് അസോസിയേഷൻ ഉൾപ്പെടെ ട്രൈസ്റ്റേറ്റ് ഏരിയയിലെ പ്രമഖു സംഘടനകളായ പമ്പ, കോട്ടയം അസോസിയേഷൻ, ഫ്രണ്ട്സ് ഓഫ് തിരുവല്ല, ഫ്രണ്ട്സ് ഓഫ് റാന്നി, പിയാനോ, സിമിയോ, മേള, ഓർമ, നാട്ടുകൂട്ടം, എൻഎസ്എസ്എസ്, എൻഡിപി, ഫിൽമ, മലയാള സാഹിത്യ വേദി, ഗാന്ധി സ്റ്റഡി സർക്കിൾ എന്നീ സംഘടനകളാണ് ട്രൈസ്റ്റേറ്റ് കേരളാ ഫോറത്തിന്റെ അംഗ സംഘടനകളായി ഉള്ളത്.
|