സ്റ്റോക്ക് ഓണ്‍ ട്രെന്‍റ്: ഗ്രേറ്റ് ബ്രിട്ടൻ സീറോ മലബാർ രൂപതയുടെ പഞ്ചവത്സര അജപാലന പദ്ധതിയുടെ( ലിവിംഗ് സ്റ്റോണ് ) ഭാഗമായി കഴിഞ്ഞ ഒരു വർഷമായി നടന്നു വന്നിരുന്ന കുടുംബ കൂട്ടായ്മ വർഷാചരണം സമാപിച്ചു . സ്റ്റോക്ക് ഓണ്‍ ട്രെൻറ്റ് സെന്‍റ് ജോസഫ് ദേവാലയത്തിൽ നടന്ന സമാപന പരിപാടിയിൽ രൂപതയുടെ വിവിധ ഇടവകളിൽ, മിഷനുകളിൽ നിന്നുമെത്തിയ വൈദികരുടെയും സന്യസ്തരുടെയും , അൽമായ പ്രതിനിധികളുടെയും സാനിധ്യത്തിൽ നടന്ന സമാപന സമ്മേളനം രൂപതാധ്യക്ഷൻ മാർ ജോസഫ് സ്രാന്പിക്കൽ ഉദ്ഘാടനം ചെയ്തു.
ഗ്രേറ്റ് ബ്രിട്ടൻ സീറോ മലബാർ രൂപതയിലെ എല്ലാ വിശ്വാസികളും ഓരോ മാസവും അവരവരുടെ കുടുംബ കൂട്ടായ്മകളിൽ പങ്കെടുക്കണമെന്ന് ഉദ്ഘാടന പ്രസംഗത്തിൽ മാർ ജോസഫ് സ്രാന്പിക്കൽ ഉത്ബോധിപ്പിച്ചു . കഴിഞ്ഞ ഒരു വർഷമായി പ്രതികൂലമായ കോവിഡ് പ്രതിസന്ധിയുടെ കാലഘട്ടത്തിലും രൂപതയുടെ എട്ട് റീജണുകളായി വ്യാപിച്ചു കിടക്കുന്ന ആയിരത്തോളം വരുന്ന കുടുംബ കൂട്ടായ്മകളെ സജീവമായി നിലനിർത്തിക്കൊണ്ട് വിവിധ കർമ്മപദ്ധതികൾ ആവിഷ്കരിച്ച് നടപ്പിലാക്കുവാനും പരിശീലന പരിപാടികളിലൂടെയും , ഓണ്‍ലൈൻ മീറ്റിംഗുകളിൽ കൂടിയും കുടുംബ കൂട്ടായ്മകളിലൂടെ രൂപതയിലെ ഓരോ കുടുംബങ്ങളുടെയും വിശ്വാസജീവിതം സഭയോട് ചേർത്ത് നിർത്തുവാൻ കുടുംബ കൂട്ടായ്മ വർഷാചരണത്തിന് കഴിഞ്ഞുവെന്ന ചാരിതാർഥ്യത്തിലാണ് കുടുംബകൂട്ടായ്മ വർഷത്തിന് സമാപനം കുറിക്കുന്നത്.
രൂപതാ വികാരി ജെനെറൽമാരായ റവ. ഫാ. ജോർജ് ചേലക്കൽ (സിഞ്ചെല്ലൂസ് ഇൻചാർജ് ), റവ. ഫാ. ജിനോ അരീക്കാട്ട് എം.സിബിഎസ്, കുടുംബ കൂട്ടായ്മ മിഷൻ ചെയർമാൻ ഫാ. ഹാൻസ് പുതിയാകുളങ്ങര , ഫാ. ജോർജ് എട്ടുപറ, റവ. ഫാ. ടോമി അടാട്ട്, റവ. സി.ആൻ മരിയ എസ്.എച്ച് എന്നിവർ പ്രസംഗിച്ചു . കോഡിനേറ്റർ ഷാജി തോമസ്, സെക്രട്ടറി റെനി സിജു എന്നിവരുടെ നേതൃത്വത്തിൽ ഉള്ള രൂപത കുടുംബ കൂട്ടായ്മ കമ്മീഷൻ അംഗങ്ങൾ പരിപാടികൾക്ക് നേതൃത്വം നൽകി. സ്റ്റോക്ക് ഓണ്‍ ട്രെൻറ്റ് ഒൗർ ലേഡി ഓഫ് ഹെല്പ് പെർപെച്വൽ മിഷന്‍റെ ആതിഥേയത്വത്തിലാണ് പരിപാടികൾ നടന്നത്.
രൂപതാധ്യക്ഷൻ മാർ ജോസഫ് സ്രാന്പിക്കൽ രക്ഷാധികാരിയും സിഞ്ചെല്ലൂസ് ഇൻചാർജ് റവ. ഫാ. ജോർജ് ചേലക്കൽ, കമ്മീഷൻ ചെയർമാൻ റെവ.ഫാ. ഹാൻസ് പുതിയാകുളങ്ങര, ഷാജി തോമസ് ( കോഡിനേറ്റർ ), റെനി സിജു തോമസ് ( സെക്രട്ടറി), വിനോദ് തോമസ് ( പിആർഒ), ഡീക്കൻ അനിൽ തോമസ് (അഡ്ഹോക്ക് പാസ്റ്ററൽ കൗണ്‍സിൽ പ്രതിനിധി) എന്നിവരും ഫിലിപ്പ് കണ്ടോത്ത് ( ബ്രിസ്റ്റോൾ), ജിനോ ജോസ് (കേംബ്രിഡ്ജ് ), ക്രിസ്റ്റി സെബാസ്റ്റ്യൻ (കൊവെൻട്രി), ജെയിംസ് മാത്യു (ഗ്ലാസ്കോ), തോമസ് ആന്‍റണി( ലണ്ടൻ), കെ.എം . ചെറിയാൻ (മാഞ്ചസ്റ്റർ ), ജിതിൻ ജോണ് (സൗത്താംപ്ടണ്‍ ), ആന്‍റണി മടുക്കക്കുഴി ( പ്രെസ്റ്റൻ ) എന്നിവർ അടങ്ങുന്ന കമ്മറ്റിയാണ് കുടുംബ കൂട്ടായ്മ വർഷത്തിന്‍റെ പ്രവർത്തനങ്ങൾക്ക് നേതൃത്വം നൽകിയത് .
ഷൈമോൻ തോട്ടുങ്കൽ
|