നോട്ടിംഗ്ഹാം: യുകെയിലെ ആദ്യകാല മലയാളി അസോസിയേഷനുകളിൽ ഒന്നും അംഗസംഖ്യകൊണ്ട് മുനിരയിലുള്ളതുമായ നോട്ടിംഗ്ഹാം മലയാളി കൾച്ചറൽ അസോസിയേഷന് പുതിയ യുവ നേതൃത്വം. കോവിഡ് മൂലം പ്രതിസന്ധിയിലായിരുന്ന നോട്ടിംഗ്ഹാം മലയാളികളിൽ ആവേശത്തിന്റെ പുത്തനുർവ് സമ്മാനിച്ചുകൊണ്ട് നോട്ടിംഗ്ഹാം മലയാളികളുടെ ഐക്യത്തിന്റെ പ്രതീകമായ എൻഎംസിഎ പുതിയ ഒരു നേതൃത്വത്തിന് കീഴിൽ പ്രവർത്തനമാരംഭിച്ചു.
നിലവിലെ യുക്മ ടൂറിസം ക്ലബ് ചെയർമാനായ ഡിക്സ് ജോർജിന്റെ നേതൃത്വത്തിൽ 21 അംഗ കമ്മിറ്റി കഴിഞ്ഞയാഴ്ച ചുമതലയേറ്റു. എൻഎംസിഎയുടെ മുൻ പ്രസിഡന്റ് എന്ന നിലയിൽ സ്തുത്യർഹമായ പ്രവർത്തനം നടത്തിയിട്ടുള്ള ഡിക്സ്, മുൻ യുക്മ ഈസ്റ്റ് മിഡ്ലാൻഡ്സ് പ്രസിഡന്റുമാണ്.
കഴിഞ്ഞ രണ്ടു വർഷക്കാലമായി ലോകമെന്പാടുമുള്ള ജനങ്ങളുടെ ജീവിതത്തെ തന്നെ മാറ്റിമറിച്ച ഒരു മഹാമാരി കാലഘട്ടത്തിനുശേഷം വരുന്ന ഒരു പുതിയ നേതൃത്വം എന്ന നിലക്ക് ഈ ഒരു വർഷം നോട്ടിംഗ്ഹാം മലയാളികളുടെ മനസിനുണർവ് ലഭിക്കുന്ന പുതിയ ആശയങ്ങളും പ്രവർത്തനങ്ങളും തങ്ങളുടെ ഭാഗത്തുനിന്നുണ്ടാകുമെന്നു കമ്മിറ്റി ഭാരവാഹികൾ അറിയിച്ചു. കഴിഞ്ഞ രണ്ടു ദശബ്ദക്കാലമായി നോട്ടിംഗ്ഹാമിലെക്കു കുടിയേറിപ്പാർത്ത നൂറുകണക്കിന് മലയാളി കുടുംബങ്ങളെ ഒരു കുടക്കീഴിൽ അണിനിരത്തി മുന്നോട്ടു പോകുന്ന എൻഎംസിഎയ്ക്കു കീഴിൽ നോട്ടിംഗ്ഹാം മലയാളികൾ ഒറ്റക്കെട്ടായി ഒപ്പമുണ്ട്.
സെപ്റ്റംബർ നാലിനു ചേർന്ന ജനറൽ ബോഡിയിൽ പ്രസിഡന്റായി ഡിക്സ് ജോർജിനെയും ജനറൽ സെക്രട്ടറിയായി അഡ്വ. ജോബി പുതുക്കുളങ്ങരയെയും തെരഞ്ഞെടുത്തു. പിന്നീട് ചേർന്ന കമ്മിറ്റി യോഗത്തിൽ ട്രഷററായി മിഥു ജെയിംസിനെയും, വൈസ് പ്രസിഡന്റായി ദീപ ദാസിനെയും, ജോയിന്റ് സെക്രട്ടറിയായി ജയകൃഷ്ണൻ നായരെയും, ജോയിന്റ് ട്രഷറർ ആയി കുരുവിള തോമസിനെയും തെരഞ്ഞെടുത്തു.
ഭാരവാഹികളായി ബെന്നി ജോസഫ് പിആർഒ, ബിജോയ് വർഗീസ്സ്പോർട്സ് ആൻഡ് കൾച്ചറൽ കണ്വീനർ , അശ്വിൻ ജോസ് യൂത്ത് കണ്വീനർ, അനിത മധു ഡാൻസ് കോർഡിനേറ്റർ, ജോമോൻ ജോസ് പ്രോഗ്രാം കോർഡിനേറ്റർ, അഭിലാഷ് തോമസ് പ്രോഗ്രാം കോർഡിനേറ്റർ, ജോസഫ് മുളങ്കുഴി പ്രോഗ്രാം കോർഡിനേറ്റർ, ബേബി കുര്യാക്കോസ് പ്രോഗ്രാം കോർഡിനേറ്റർ, ടോംസ് ഡാനിയേൽ ചാരിറ്റി കോർഡിനേറ്റർ, അരുണ് ജോസ് മാൻസ്ഫീൽഡ് ഏരിയ കോർഡിനേറ്റർ, ജിഷ്മോൻ മാത്യു ആർട്സ് കോർഡിനേറ്റർ, അജേഷ് ജോണ് ബാഡ്മിന്റണ് കോർഡിനേറ്റർ, ബിബിൻ ജോസഫ് ബാഡ്മിന്റണ് കോർഡിനേറ്റർ, സാവിയോ ജോസ് എക്സ്ഒഫീഷ്യയോ, റോയ് ജോർജ് എക്സ്ഒഫീഷ്യയോ എന്നിവരെ തെരഞ്ഞെടുത്തു.
ബെന്നി ജോസഫ്
|