ഫിലഡൽഫിയ: സാഹോദര നഗരത്തിന്‍റെ തിരുമുറ്റത്ത് ഇതര സാമൂഹിക സാംസ്കാരിക പ്രാദേശിക സംഘടനകളുടെ ഐക്യവേദിയായ ട്രൈസ്റ്റേറ്റ് കേരള ഫോറമിന്റെ ദേശീയ ഓണാഘോഷം ഓഗസ്റ്റ് 21 ശനിയാഴ്ച വൈകുന്നേരം മൂന്നു മുതൽ ജോഷി കുര്യാക്കോസ് നഗർ (CANNSTATTER VOLKFEST VEREIN, 9130 ACCADEMY RD, PHILADELPHIA, PA, 19114) വച്ച് നടത്തുന്നതാണ്.
മലയാളികളുടെ ദേശീയോത്സവമായ ഓണത്തിന്‍റെ പൈതൃകം നഷ്ടപ്പെടുത്താതെ പ്രവാസികളുടെ ഇടയിൽ ആഘോഷിച്ചു വരുന്ന ഓണാഘോഷത്തിൽ വിശിഷ്ടാതിഥികളെ ആനയിച്ചുകൊണ്ടുള്ള ഘോഷയാത്ര, സാംസ്കാരിക പൊതുസമ്മേളനം, ആദരിക്കൽ ചടങ്ങ്, വിഭവസമൃദ്ധമായ ഓണസദ്യ, അടുക്കള തോട്ടമത്സരം, വടംവലി മത്സരം തുടങ്ങിയ ധാരാളം വ്യത്യസ്തവും വിപുലവുമായ ഓണാഘോഷമാണ് ഈ വർഷം ഒരുക്കിയിരിക്കുന്നതെന്ന് സുമോദ് നെല്ലിക്കാല (ചെയർമാൻ, ട്രൈസ്റ്റേറ്റ് കേരള ഫോറം) അറിയിച്ചു.
ഗൃഹാതുരത്വമുണർത്തുന്ന ഓണാഘോഷമാണ് എക്കാലത്തും ട്രൈസ്റ്റേറ്റ് കേരള ഫോറം പ്രവാസികൾക്കായി ഒരുക്കുന്നത്. ഭാവിതലമുറയിലേക്ക് നാടിന്‍റെ ചരിത്രപരമായ ഓർമ്മകൾ പങ്കുവയ്ക്കുന്നതിനും കൈമാറുന്നതിനുമായിട്ടാണ് ഇതുപോലുള്ള ആഘോഷങ്ങൾക്കു നേതൃത്വം കൊടുത്തുവരുന്നത്. അമേരിക്കൻ മലയാളികളുടെ ഇടയിലും ഓരോ വർഷം ചെല്ലുന്തോറും ഓണാഘോഷങ്ങളുടെ പ്രസക്തി വർധിച്ചു വരികയാണ്. എന്നാൽ ഓണാഘോഷങ്ങൾ സാമൂഹിക സാംസ്കാരിക വേദികളിലാണ് ആഘോഷിക്കേണ്ടിയതെന്നും മറിച്ച് ദേവാലയങ്ങളുടെ അന്തരീക്ഷങ്ങളിലും അണുകൂട്ടങ്ങളിലും നടത്തി ഓണാഘോഷത്തിന്റെ പ്രസക്തി പ്രവാസികളുടെ ഇടയിൽ കുറയുകയാണെന്നും വിൻസെന്‍റ് ഇമ്മാനുവേൽ (ചെർമാൻ, ഓണാഘോഷം) പറഞ്ഞു.
നാടൻ കലാരൂപങ്ങളുടെ അവതരണം, ചെണ്ടമേളം, നിറപകിട്ടാർന്ന അത്തപൂക്കളം തന്‍റെ പ്രജകളുടെ ക്ഷേമം അന്വേഷിക്കാനായി വർഷത്തിലൊരിക്കൽ മാത്രം എത്താറുള്ള മാവേലി മന്നന്‍റെ എഴുന്നള്ളത്ത്, കൈകൊട്ടിക്കളി, മെഗാ തിരുവാതിര, നൃത്തവിദ്യാലയങ്ങളുടെ നൃത്തകലാവിരുന്ന്, ഗാനമേള തുടങ്ങിയ നിരവധി വ്യത്യസ്ത തരത്തിലുള്ള കാര്യപരിപാടികൾ ഈ വർഷം അരങ്ങേറുന്നതാണ്.
ട്രൈസ്റ്റേറ്റ് കേരള ഫോറമിന്റെ പ്രൗഢഗംഭീരമായ ഓണാഘോഷ വേദിയിൽ വച്ച് പതിവുപോലെ എല്ലാവർഷവും നടത്തിവരാറുള്ള ആദരിക്കൽ ചടങ്ങ് ഈ വർഷവും ഉണ്ടായിരിക്കുന്നതാണ്. പ്രവാസ ജീവിതത്തിനിടയിലെ ജോലിത്തിരക്കിനിടയിലും തങ്ങളുടേതായ കഴിവുകൾ സമൂഹത്തിന് സംഭാവന ചെയ്യുകയും ജീവിതത്തിൽ സ്വയം തനതായ വ്യത്യസ്ത മേഖലകളിൽ തങ്ങളുടേതായ സംഭാവന ചെയ്ത പ്രതിഭാധനരായ മഹത്വ്യക്തികളെയാണ് ആദരിക്കുന്നത്. വർത്തമാന കാലഘട്ടത്തിൽ അവാർഡുകളുടെ പ്രസക്തി കുറഞ്ഞുവരുന്പോഴും അവാർഡ് നിർണയത്തിലെ സുധാര്യതകൊണ്ടും അതിലും ഉപരിയായി അർഹിക്കുന്നവരിൽ എത്തുന്പോഴുമാണ് പുരസ്കാരങ്ങളുടെ മഹത്വം വർധിക്കുന്നതെന്നും ജീമോൻ ജോർജ് (ചെയർമാൻ, അവാർഡ് കമ്മറ്റി) പറയുകയുണ്ടായി.
ഈ വർഷത്തെ ട്രൈസ്റ്റേറ്റ് കേരള ഫോറം അവാർഡ് 2021 ന് ഐക്യകണ്ഠേനെ തെരഞ്ഞെടുത്തത് മെരിലാന്‍റ് സംസ്ഥാനത്ത് മോണ്ട്ഗോമറി കൗണ്ടിയിൽ അസി. പോലീസ് കമ്മീഷണറായി സേവനം ചെയ്യുന്ന ക്യാപ്റ്റൻ ഷിബു ഫിലിപ്പോസിനാണ്. പോലീസ് ഡിപ്പാർട്ട്മെന്‍റിലെ വിവിധ മേഖലകളിൽ പ്രവർത്തിക്കുകയും, തെളിയിക്കപ്പെടാതെ വന്ന നിരവധി കുറ്റകൃത്യങ്ങൾ സ്വയം ഏറ്റെടുത്ത് തെളിയിക്കപ്പെടുന്നതിനായി നേതൃത്വം കൊടുക്കുകയും കുറ്റവാളികളെ ശിക്ഷിക്കുകയും ചെയ്തതിന് മറ്റു നിരവധി പ്രശംസകൾക്കും പുരസ്കാരങ്ങൾക്കും അർഹനായ വ്യക്തിയാണ് ക്യാപ്റ്റൻ ഷിബു.
മെരിലാന്‍റ് നാഷനൽ ക്യാപിറ്റൽ പാർക്ക് പ്ലാനിംഗ് കമ്മീഷൻ അംഗവും സാമൂഹിക വിദ്യാഭ്യാസ മേഖലകളിൽ സാങ്കേതിക സാന്പത്തിക സഹായങ്ങൾ നൽകി പ്രവർത്തിച്ചു വരുന്ന അമേരിക്കൻ മലയാളി ലോ എൻഫോഴ്സ്മെന്റ് യുണൈറ്റഡ് എന്ന സംഘടനയുടെ പ്രഥമ വൈസ് പ്രസിഡന്‍റുമാണ് ക്യാപ്റ്റൻ ഷിബു ഫിലിപ്പോസ്. മാനേജ്മെന്‍റ് സയൻസിൽ ഉന്നത വിദ്യാഭ്യാസം മെരിലാന്‍റ് യൂണിവേഴ്സിറ്റിയിൽ നിന്നും കരസ്ഥമാക്കുകയും ചെയ്തിട്ടുണ്ട്. ബീന ഫിലിപ്പോസ് (ഭാര്യ), ഡാനിയേൽ, ദിവ്യ, ധന്യ (മക്കൾ), കുടുംബസമേതം മെരിലാന്‍റിൽ താമസിച്ചു വരികയാണ്.
ഓണാഘോഷത്തിന്റെ വൻ വിജയത്തിനായി സാജൻ വർഗീസ്, രാജൻ ശമുവേൽ, അലക്സ് തോമസ്, ഫീലിപ്പോസ് ചെറിയാൻ, ജോബി ജോർജ്, ജോർജ് ഓലിക്കൽ, ജോർജ് നടവയൽ, കുര്യൻ രാജൻ, സുധാ കർത്താ, റോണി വർഗീസ്, ലെനോ സ്കറിയ, ബെന്നി കൊട്ടാരത്തിൽ, സുരേഷ് നായർ, ജോണ് ശമുവേൽ, ജോണ് പി. വർക്കി, റോയി ശമുവേൽ, ദിലീപ് ജോർജ്, ജോർജി കാവിൽ, പി. കെ. സോമരാജൻ, ബ്രിജിറ്റ് വിൻസന്‍റ്, ശോശാമ്മ ചെറിയാൻ എന്നിവരുടെ നേതൃത്വത്തിലുള്ള വിവിധ കമ്മറ്റികൾ ദേശീയ ഓണാഘോഷത്തിന്റെ വൻ വിജയത്തിനായി വിപുലമായ ക്രമീകരണങ്ങൾ നടത്തിവരുന്നതായി ട്രൈസ്റ്റേറ്റ് കേരള ഫോറമിന്റെ പത്രകുറിപ്പിൽ അറിയിച്ചു.
റിപ്പോർട്ട്: ജീമോൻ ജോർജ്
|