'എയര്‍ ഇന്ത്യയുടെ ചൂഷണം അവസാനിപ്പിക്കുക'
Thursday, March 3, 2016 6:12 AM IST
കുവൈത്ത്: പൊതു അവധി സമയങ്ങളില്‍ പ്രവാസികളെ ചൂഷണം ചെയ്യുന്ന വിധത്തില്‍ അനിയന്ത്രിതമായ നിരക്കു വര്‍ധിപ്പിക്കുന്നതില്‍ എയര്‍ ഇന്ത്യയുടെ നിലപാട് പ്രവാസി സമൂഹത്തോടുള്ള വെല്ലുവിളിയാണെന്നും ഭരണകൂടം ഇടപെട്ട് ഈ ചൂഷണം അവസാനിപ്പിക്കാന്‍ ആവശ്യമായ നടപടികള്‍ സ്വീകരിക്കണമെന്നും ഇന്ത്യന്‍ ഇസ്ലാഹി സെന്റര്‍ എക്സിക്യൂട്ടീവ് യോഗം ആവശ്യപ്പെട്ടു.

പതിനഞ്ചു മണിക്കൂറോളം യാത്ര ചെയ്യേണ്ട യൂറോപ്യന്‍ നാടുകളിലേക്കുള്ള യാത്ര നിരക്കിനേക്കാള്‍ പതിന്മടങ്ങാണു ഗള്‍ഫ് രാജ്യങ്ങളിലേക്കുള്ള യാത്ര നിരക്ക്. കൂടാതെ തിരുവനന്തപുരം, കൊച്ചി എന്നിവിടങ്ങളെ അപേക്ഷിച്ച് കോഴിക്കോട്ടുനിന്നു ഗള്‍ഫിലേക്കു മൂന്നിരട്ടിയോളം നിരക്കാണ് ഇപ്പോള്‍ ഈടാക്കുന്നത്. തൊഴില്‍ തേടി വിദേശങ്ങളിലേക്കു പോകുന്ന മലയാളികളെ ഈ വിധം പീഡിപ്പിക്കുന്നതിനെതിരേ പ്രവാസിസമൂഹം ഒറ്റക്കെട്ടായി ചെറുക്കണമെന്നും യോഗം ആവശ്യപ്പെട്ടു.

യോഗത്തില്‍ ഐഐസി പ്രസിഡന്റ് എം.ടി. മുഹമ്മദ് അധ്യക്ഷത വഹിച്ചു. ഐഎസ്എം മുന്‍ ജനറല്‍ സെക്രട്ടറി ഇസ്മയില്‍ കരിയാട്, സിദ്ദീഖ് മദനി, വി.എ. മൊയ്തുണ്ണി, ഇബ്രാഹിം കുട്ടി സലഫി, അന്‍വര്‍ സാദത്ത്, മുഹമ്മദ് ബേബി, യൂനുസ് സലീം, പി.വി. അബ്ദുല്‍ വഹാബ്, സയിദ് അബ്ദുറഹ്മാന്‍, മുഹമ്മദ് അരിപ്ര, അയൂബ് ഖാന്‍ തുടങ്ങിയവര്‍ പ്രസംഗിച്ചു.

റിപ്പോര്‍ട്ട്: സലിം കോട്ടയില്‍
Copyright @ 2022 , Rashtra Deepika Ltd.