ബ്രിട്ടന്‍ യൂറോപ്പ് വിടാനുറച്ച് ടോറികള്‍; നേതൃത്വം നല്‍കാന്‍ പ്രീതി പട്ടേല്‍
Wednesday, February 10, 2016 10:09 AM IST
ലണ്ടന്‍: യൂറോപ്പും യുകെയും തമ്മിലുള്ള ബന്ധത്തിന്റെ ഭാവി നിര്‍ണയിക്കാന്‍ അടുത്ത വര്‍ഷം ജനഹിത പരിശോധന നടക്കുകയാണ് യുകെയില്‍. എന്നാല്‍, ബ്രിട്ടന്‍ യൂറോപ്പ് വിടണമെന്ന് അശേഷം ആഗ്രഹിക്കുന്ന ആളല്ല ബ്രിട്ടീഷ് പ്രധാനമന്ത്രി ഡേവിഡ് കാമറോണ്‍. പരോക്ഷമായി അദ്ദേഹം അത് പലവട്ടം വ്യക്തമാക്കിക്കഴിഞ്ഞു.

പറഞ്ഞു നില്‍ക്കാന്‍ ചില ആനുകൂല്യങ്ങളും ഇളവുകളും നേടിയെടുത്ത് ഹിതപരിശോധനയില്‍ ജനങ്ങളെക്കൊണ്ട് യൂറോപ്പില്‍ തുടരണമെന്ന് വോട്ടു ചെയ്യിക്കാന്‍ പെടാപ്പാട് പെടുകയാണ് അദ്ദേഹം.

എന്നാല്‍, ടോറി പാര്‍ട്ടിയുടെ പിന്തുണ കാമറോണിന് ഇക്കാര്യത്തില്‍ ഉറപ്പിക്കാന്‍ കഴിയില്ല. പാര്‍ട്ടിയിലെ വലിയൊരു വിഭാഗം യൂറോപ്പ് വിട്ടേ മതിയാകൂ എന്ന നിലപാടില്‍ ഉറച്ചു നില്‍ക്കുകയാണ്. ഈ വിഭാഗത്തിനു നേതൃത്വം നല്‍കുന്നത് ഇന്ത്യന്‍ വംശജയായ മന്ത്രി പ്രീതി പട്ടേലും.

പോരാട്ടം ഔദ്യോഗികമാക്കാന്‍ തീരുമാനിച്ചിരിക്കുകയാണ് പ്രീതിയും കൂട്ടരും. ഇതിനായി പ്രധാനമന്ത്രി കാമറോണിനെ കാണാന്‍ അവര്‍ അനുമതിയും തേടിക്കഴിഞ്ഞു.

ഇയാന്‍ ഡങ്കന്‍ സ്മിത്ത്, ക്രിസ് ഗ്രേലിങ് എന്നീ പ്രമുഖരും ഇക്കാര്യത്തില്‍ പ്രീതിക്കു പിന്നില്‍ ഉറച്ചു നില്‍ക്കുന്നുവെന്നാണു സൂചന.

റിപ്പോര്‍ട്ട്: ജോസ് കുമ്പിളുവേലില്‍
Copyright @ 2022 , Rashtra Deepika Ltd.