ന്യൂയോര്‍ക്ക് മാവേലി തീയേറ്റര്‍ ഉദ്ഘാടനം ഞായറാഴ്ച; 'എന്നു നിന്റെ മൊയ്തീന്‍' ഉദ്ഘാടന ചിത്രം
Friday, October 16, 2015 5:25 AM IST
ന്യൂയോര്‍ക്ക്: ട്രൈസ്റ്റേറ്റ് മലയാളികളുടെ കാത്തിരിപ്പിനു വിരാമമിട്ടുകൊണ്ടു പുനരാരംഭിക്കുന്ന മാവേലി തീയേറ്ററിന്റെ ഉദ്ഘാടനം റോക്ക്ലാന്റിലെ സ്പ്രിംഗ് വാലിയില്‍ ഞായറാഴ്ച വൈകുന്നേരം നാലിനു പ്രശസ്ത സംവിധായകന്‍ രഞ്ജിത് നിര്‍വഹിക്കും.

അടുത്തകാലത്തിറങ്ങിയതില്‍ ഏറ്റവും വിജയംകണ്ട സൂപ്പര്‍ഹിറ്റ് ചിത്രം 'എന്നു നിന്റെ മൊയ്തീന്‍' തുടര്‍ന്നു പ്രദര്‍ശിപ്പിക്കും. സിനിമയുടെ യഥാര്‍ത്ഥ നായകന്‍ ബി.പി. മൊയ്തീന്റെ ബന്ധു യോങ്കേഴ്സിലെ കാര്‍ഡിയോളജിസ്റ് ഡോ. അബ്ദുള്‍ അസീസും ചടങ്ങില്‍ പങ്കെടുക്കും.

തീയേറ്റര്‍ പുനരാരംഭിക്കുന്നതിനു നാനാഭാഗത്തുനിന്നുമായി വലിയ പ്രതികരണമാണ് ലഭിക്കുന്നതെന്നും ഇതില്‍ തികഞ്ഞ ചാരിതാര്‍ത്ഥ്യമുണ്െടന്നും തീയേറ്ററിന്റേയും മലയാളം പത്രത്തിന്റേയും സാരഥി ജേക്കബ് റോയി പറഞ്ഞു. 480 പേര്‍ക്ക് ഇരിക്കാവുന്ന അത്യാധുനിക സംവിധാനങ്ങളുള്ള തീയേറ്ററാണ് സ്പ്രിംഗ് വാലിയില്‍ സജ്ജമാക്കിയിരിക്കുന്നത്. രാമപ്പോ ടൌണിന്റെ കീഴിലുള്ള പെര്‍ഫോമിംഗ് ആര്‍ട്സ് സെന്ററാണ് മാവേലി തീയേറ്ററാകുന്നത്.

നേരത്തെ തീയേറ്റര്‍ നിര്‍ത്തിയപ്പോള്‍ അതുതന്നെ ഏറെ ദു:ഖിപ്പിച്ചതായി സംവിധായകന്‍ രഞ്ജിത് പറഞ്ഞു. വീണ്ടും തീയേറ്റര്‍ തുറക്കുന്നത് ആഹ്ളാദം പകരുന്നു. പൈറസിയാണ് നേരത്തെ തീയേറ്ററിനെ ദോഷകരമായി ബാധിച്ചത്. പൈറസിക്കെതിരെ ശക്തമായ നടപടികള്‍ വിവിധ ഗവണ്‍മെന്റുകള്‍ സ്വീകരിച്ചതിന്റെ ഫലം കാണുന്നുവെന്നാണ് ഇതു സൂചിപ്പിക്കുന്നത്. തീയേറ്ററിന്റെ വിലാസം: 64 മെയിന്‍ സ്ട്രീറ്റ്, സ്പ്രിംഗ് വാലി, ന്യൂയോര്‍ക്ക്. കൂടുതല്‍ വിവരങ്ങള്‍ക്ക്: 914 841 1567.
Copyright @ 2022 , Rashtra Deepika Ltd.