അമേരിക്കയില്‍ അയ്യപ്പക്ഷേത്രം വിഗ്രഹഘോഷയാത്രയ്ക്ക് സ്വീകരണം
Tuesday, October 13, 2015 6:49 AM IST
തിരുവനന്തപുരം: വേള്‍ഡ് അയ്യപ്പ സേവാ ട്രസ്റ് ന്യൂയോര്‍ക്കില്‍ നിര്‍മിക്കുന്ന അയ്യപ്പ ക്ഷേത്രത്തിലേക്കുള്ള വിഗ്രഹ ഘോഷയാത്ര ഒക്ടോബര്‍ 14 സമാപിക്കും.

ശബരിമല തന്ത്രി കണ്ഠരര് രാജീവരരുടെ പ്രത്യേക പൂജകള്‍ക്കുശേഷം പ്രയാണ മാരംഭിച്ച ഘോഷാത്രയ്ക്കു വിവിധ ക്ഷേത്രങ്ങളില്‍ ഗംഭീര വരവേല്‍പ്പാണ് ലഭിച്ചത്. ആറന്മുള പാര്‍ഥസാരഥി ക്ഷേത്രത്തില്‍ ദേവസ്വം അധികൃതരും പള്ളിയോടസേവാസംഘം ഭാരവാഹികളും ഹിന്ദു ഐക്യവേദി പ്രവര്‍ത്തകരും ചേര്‍ന്നു സ്വീകരിച്ചു. വഞ്ചിപ്പാട്ട്, ആര്‍പ്പുവിളി, ചെണ്ടമേളം തുടങ്ങിയവയുടെ അകമ്പടിയോടെയായിരുന്നു സ്വീകരണം.

വേള്‍ഡ് അയ്യപ്പ സേവാ ട്രസ്റ് ചെയര്‍മാന്‍ ഗുരുസ്വാമി പാര്‍ഥസാരഥി പിള്ള ആമുഖ പ്രഭാഷണം നടത്തി. അയ്യപ്പ സേവാ സമാജം ജനറല്‍ സെക്രട്ടറി കുമ്മനം രാജശേഖരന്‍ ആശംസ നേര്‍ന്നു. ട്രസ്റ് ജനറല്‍ സെക്രട്ടറി പത്മജ പ്രേം, അംഗങ്ങളായ രാജന്‍നായര്‍, അപ്പുക്കുട്ടന്‍ പിള്ള, സോമരാജന്‍ നായര്‍, തങ്കമണി പിള്ള, ഓമന വാസുദേവ്, രുക്മണി നായര്‍, രമണി പിള്ള, ശാരദ നായര്‍ തുടങ്ങിയവര്‍ സന്നിഹിതരായിരുന്നു.

പത്തനംതിട്ട, കോട്ടയം ജില്ലകളിലെ വിവിധ ക്ഷേത്രങ്ങള്‍, കരയോഗമന്ദിരങ്ങള്‍, സാംസ്കാരിക കേന്ദ്രങ്ങള്‍ എന്നിവിടങ്ങളിലും സ്വീകരണം നല്‍കി. തോട്ടമണ്‍കാവ് ദേവീക്ഷത്രത്തില്‍ നടന്ന സ്വീകരണത്തില്‍ വനിതാ കമ്മീഷന്‍ അംഗം ഡോ. പ്രമീളാദേവി മുഖ്യാതിഥിയായിരുന്നു. റാന്നി പുല്ലുപുറം ക്ഷേത്രത്തില്‍ നടന്ന സ്വീകരണത്തില്‍ ശബരിമലയിലേയ്ക്ക് തിരുവാഭരണം ചുമക്കുന്ന ഗംഗാധരന്‍പിള്ളയുടെ നേതൃത്വത്തിലുള്ള സംഘത്തെ ആദരിച്ചു. കോട്ടയത്ത് സൂര്യകാലടി മനയില്‍ എത്തിയ വിഗ്രഹത്തില്‍ സൂര്യന്‍ സൂര്യ നമ്പൂതിരിപ്പാടിന്റെ നേതൃത്വത്തില്‍ പ്രത്യേക പൂജ നടത്തി. തിരുവനന്തപുരത്ത് ഉദിയന്‍കുളങ്ങര ദേവിക്ഷേത്രം, പൂജപ്പുര കല്ലറമഠം, ആറ്റുകാല്‍ ക്ഷേത്രം, ശ്രീ പത്മനാഭസ്വാമിക്ഷേത്രം, കരിക്കകം ദേവി ക്ഷേത്രം എന്നിവിടങ്ങളിലും സ്വീകരണം നല്‍കി.

14നു (ബുധന്‍) മാവേലിക്കര ചെറുകോല്‍ ശ്രീധര്‍മ ശാസ്താ ക്ഷേത്രത്തിലെ സ്വീകരണത്തോടെ ഘോഷയാത്ര സമാപിക്കും. കൊല്ലം ഉമയനല്ലൂര്‍ ക്ഷേത്രത്തില്‍ ഗംഭീരസ്വീകരണവും ഒരുക്കിയിട്ടുണ്ട്.

ന്യുയോര്‍ക്ക് കേന്ദ്രമായി ഗുരുസ്വാമി മൂന്നുപതിറ്റാണ്ടായി പ്രവര്‍ത്തിക്കുന്ന സംഘടനയാണ് വേള്‍ഡ് അയ്യപ്പ സേവാ ട്രസ്റ്. അമേരിക്കയിലെ ആദ്യ അയ്യപ്പക്ഷേത്രമാണ് ന്യൂയോര്‍ക്കില്‍ ഉയരുന്നതെന്നു ട്രസ്റ് ചെയര്‍മാന്‍ ഗുരുസ്വാമി പാര്‍ഥസാരഥി പിള്ള, ജനറല്‍ സെക്രട്ടറി പത്മജാ പ്രേം എന്നിവര്‍ പത്രസമ്മേളനത്തില്‍ പറഞ്ഞു.
Copyright @ 2022 , Rashtra Deepika Ltd.