ഷിക്കാഗോ ക്നാനായ കത്തോലിക്കാ ഫൊറോനായില്‍ മോണ്‍. മൈക്കിള്‍ വെട്ടിക്കാട്ടിനു സ്വീകരണം
Wednesday, June 3, 2015 5:14 AM IST
ഷിക്കാഗോ: കോട്ടയം അതിരൂപത വികാരി ജനറാളായതിനുശേഷം, പ്രവാസികളുടെ പ്രഥമ ദേവാലയമായ ഷിക്കാഗോ സേക്രഡ് ഹാര്‍ട്ട് ക്നാനായ കത്തോലിക്കാ ഫൊറോനായിലേക്കുള്ള പ്രഥമ സന്ദര്‍ശനത്തില്‍, മോണ്‍. മൈക്കിള്‍ വെട്ടിക്കാട്ടിനു വിശ്വാസികളുടെ സാന്നിധ്യത്തില്‍ സ്വീകരണം നല്‍കി.

ഫാ. എബ്രാഹം മുത്തോലത്തിനുശേഷം, കോട്ടയം അതിരൂപതയുടെ സാമൂഹ്യസേവന വിഭാഗമായ കോട്ടയം സോഷ്യല്‍ സൊസൈറ്റിയുടെ സെക്രട്ടറിയായും, അതിരൂപതയുടെ അജപാലനകേന്ദ്രമായ ചൈതന്യ പാസ്റര്‍ സെന്ററിന്റെ ഡയറക്ടറായും, ദീര്‍ഘകാലം സേവനമനുഷ്ഠിച്ച്, സേവനപാതയില്‍ വേറിട്ട ശൈലി മുഖമുദ്രയാക്കിയ മോണ്‍സിഞ്ഞോറിന്റെ ഉന്നതമായ പുതിയ ദൌത്യത്തെ ഫൊറോനാ വികാരി ഫാ. എബ്രാഹം മുത്തോലത്ത് അനുമോദിക്കുകയും, എല്ലാ പ്രാര്‍ഥനകളും ആശംസകളും നല്‍കുകയും ചെയ്തു. കൈക്കാരന്മാരായ തോമസ് നെടുവാമ്പുഴ, ജിമ്മി മുകളേല്‍, ജോര്‍ജ് പുള്ളോര്‍കുന്നേല്‍, ഫിലിപ് പുത്തെന്‍പുരയില്‍ എന്നിവര്‍ മോണ്‍. മൈക്കിള്‍ വെട്ടിക്കാട്ടിന് ബൊക്കെ നല്‍കി സ്വീകരിച്ചു. ചടങ്ങുകള്‍ക്കു ഫാ. ജോസെഫ് കല്ലടാന്തിയില്‍, പടമുഖം ഫൊറോന വികാരി ഫാ. സാബു മാലിതുരുത്തേല്‍, അസി. വികാരി ഫാ. സുനി പടിഞ്ഞാറേക്കര എന്നിവര്‍ സന്നിഹിതരായിരുന്നു.

റിപ്പോര്‍ട്ട്: ബിനോയി കിഴക്കനടി
Copyright @ 2022 , Rashtra Deepika Ltd.