ഫോമാ കേരള കണ്‍വന്‍ഷന് അതിഥിയായി നടന്‍ നരേന്‍ : Deepika.com Nri News Americas

തിരുവനന്തപുരം: നടന്‍ നരേന്‍ തിരുവനന്തപുരത്ത് നടക്കുന്ന ഫോമ കേരളാ കണ്‍വന്‍ഷനില്‍ അതിഥി യായെത്തും. ഓഗസ്റ് ഒന്നിനു നടക്കുന്ന കണ്‍വന്‍ഷനില്‍ നരേന്‍ പങ്കെടുക്കും. ഫോമയുടെ ക്ഷണം സ്വീകരിച്ച നരേന്‍ നേപ്പാളിനുവേണ്ടി ഫോമ നടത്തുന്ന ഫണ്ട് ശേഖരണത്തെ അഭിനന്ദിക്കുകയും ചെയ്തു . വൈകുന്നേരം നടക്കുന്ന വിരുന്നു സത്കാരത്തില്‍ തന്റെയും കുടുംബത്തിന്റെയും സാന്നിധ്യം ഉണ്ടാകുമെന്നു നരേന്‍ അറിയിച്ചു. നരേന്റെ സുഹൃത്തും ഫോമയുടെ ജോയിന്റ് ട്രഷററും ആയ ജോഫ്രിന്‍ ജോസിന്റെ പ്രത്യേക താത്പര്യപ്രകാരമാണു നരേന്‍ കണ്‍വന്‍ഷനില്‍ പങ്കെടുക്കുന്നത്. ന്യൂയോര്‍ക്കില്‍ ബിസിനസ് ചെയ്യുന്ന ജൊഫ്രിന്‍, ഫോമാ വിവിധ പ്രോജക്ടുകളുടെ മേല്‍ നോട്ടം നടത്തി വരുന്നു.

2002 ല്‍ ചലച്ചിത്ര രംഗത്തെത്തിയ നരേന്‍, മലയാളത്തിലും തമിഴിലും ഉള്‍പ്പെടെ നിരവധി സിനിമകളില്‍ അഭിനയിച്ചിട്ടുണ്ട്.നരേന്‍ കൈകാര്യം ചെയ്ത വേഷങ്ങള്‍ പലതും പ്രേക്ഷക ശ്രദ്ധ പിടിച്ചു പറ്റി .അടയാര്‍ ഫിലിം ഇന്‍സ്റിറ്റ്യൂട്ടില്‍നിന്ന് അഭിനയം പഠിച്ചിറങ്ങിയ നരേന്‍ സംവിധയകാന്‍ രാജീവ് മേനോന്റെ സഹായിയായാണ് സിനിമയില്‍ ചുവടുറപ്പിച്ചത്. അടൂര്‍ ഗോപാലകൃഷ്ണന്റെ നിഴല്‍ക്കുത്ത് എന്ന സിനിമയിലൂടെയാണ് നരേന്‍ അഭ്രപാളിയില്‍ എത്തുന്നത്. വളരെ ശ്രദ്ധേയമായ വേഷം മാത്രം തെരഞ്ഞെടുക്കുന്ന നരേന്‍ 30ല്‍ അധികം സിനിമകളില്‍ അഭിനയിച്ചിട്ടുണ്ട്. ഫോര്‍ ദി പീപ്പിള്‍ (2004), അച്ചുവിന്റെ അമ്മ (2005), ക്ളാസ്സ്മേറ്റ്സ് (2006) തുടങ്ങിയവ അദ്ദേഹത്തിന്റെ അഭിനയ മികവു തെളിയിച്ച ചിത്രങ്ങളാണ്.

തിരുവനന്തപുരം മസ്കറ്റ് ഹോട്ടലില്‍ നടക്കുന്ന ചടങ്ങില്‍ കേരള മുഖ്യമന്ത്രി ഉമ്മന്‍ ചാണ്ടി തിരിതെളിയിച്ചു ഉദ്ഘാടനം ചെയ്യും. ആഭ്യന്തര മന്ത്രി രമേശ് ചെന്നിത്തല, ആരോഗ്യമന്ത്രി വി എസ് ശിവകുമാര്‍, സി പി എം സംസ്ഥാന സെക്രട്ടറി കോടിയേരി ബാലകൃഷ്ണന്‍ എന്നിവര്‍ ഉള്‍പ്പെടെ രാഷ്ട്രീയ-സാംസ്കാരിക രംഗത്തെ പ്രമുഖര്‍ പങ്കെടുക്കുമെന്ന് ഭാരവാഹികള്‍ അറിയിച്ചു.

കൂടുതല്‍ വിവരങ്ങള്‍ക്ക്: ആനന്ദന്‍ നിരവേല്‍ 954 675 3019, ഷാജി എഡ്വേര്‍ഡ് 917 439 0563,ജോയി ആന്തണി 954 328 5009, ഡോ: ജേക്കബ് തോമസ് 718 406 2541

റിപ്പോര്‍ട്ട്: വിനോദ് കൊണ്ടൂര്‍ ഡേവിഡ്