സാന്‍ അന്റോണിയോയിലെ ക്രിസ്മസ് ആഘോഷം വര്‍ണ്ണാഭമായി
Friday, January 9, 2015 2:42 AM IST
സാന്‍ അന്റോണിയ: സെന്റ് ആന്റണീസ് ക്നാനായ പള്ളിയില്‍ പതിവുപോലെ ഈവര്‍ഷവും വിപുലമായ രീതിയില്‍ ക്രിസ്മസ് ആഘോഷിച്ചു. പള്ളിയിലെ ഭക്ത സംഘടനകളുടെ നേതൃത്വത്തില്‍ ഇടവകയിലെ എല്ലാ ഭവനങ്ങളിലുമെത്തി കരോള്‍ ഗാനങ്ങള്‍ ആലപിച്ചു. 24-ന് നടന്ന ക്രിസ്മസ് കുര്‍ബാന ഇടവകാംഗങ്ങള്‍ക്ക് ഒരു ദിവ്യാനുഭവമായി മാറി. തുടര്‍ന്നുള്ള ക്രിസ്തുമസ് ഫ്രണ്ടുകള്‍ക്ക് വേണ്ടിയുള്ള സമ്മാന കൈമാറ്റം ഏവരിലും കൂട്ടായ്മയുടെ പ്രധാന്യം വിളിച്ചറിയിച്ചു.

25-ന് നടന്ന കൂടാര യോഗങ്ങളുടെ വാര്‍ഷികം ദിവ്യബലിയോടെ ആരംഭിച്ചു. തുടര്‍ന്ന് നടന്ന കലാസന്ധ്യയില്‍ ഇടവകയിലെ ആബാലവൃദ്ധം ജനങ്ങളും പങ്കെടുത്തു. കൊച്ചു കുട്ടികള്‍ നടത്തിയ ക്നാനായ പാരമ്പര്യം വിളിച്ചോതുന്ന കലാപരിപാടികള്‍ കാണികളില്‍ ആവേശമുണര്‍ത്തി.

2014-ലെ ബൈബിള്‍ ക്വിസ് മത്സരത്തില്‍ ഷിന്റോ -സായ്മോള്‍ ദമ്പതികള്‍ എവര്‍റോളിംഗ് ട്രോഫി കരസ്ഥമാക്കി. കുട്ടികളുടെ ബൈബിള്‍ ക്വിസ് മത്സരത്തില്‍ തരുണ്‍ കാരക്കാട്ട് എവര്‍റോളിംഗ് ട്രോഫിയും മറ്റ് മത്സരാര്‍ത്ഥികള്‍ പെര്‍ഫോമന്‍സ് വിന്നിംഗ് അവാര്‍ഡും നേടി. പി.ആര്‍.ഒ വിനു മാവേലില്‍ അറിയിച്ചതാണിത്.

റിപ്പോര്‍ട്ട്: ജോയിച്ചന്‍ പുതുക്കുളം
Copyright @ 2022 , Rashtra Deepika Ltd.