വെള്ളിക്കുളങ്ങര: ചൊക്കന കാരിക്കടവ് പുഴയില്‍ കുളിക്കാനിറങ്ങിയ യുവാവ് മുങ്ങി മരിച്ചു. കോടാലി വലിയകത്ത് കുഞ്ഞുമുഹമ്മദ് മകന്‍ നസീബാണ് (36) മരിച്ചത്. ഇന്നലെ വൈകീട്ടാണ് ് സംഭവം.
കാരിക്കടവില്‍ പുഴക്കുകുറുകെ നിര്‍മിച്ചിട്ടുള്ള തടയണയില്‍ കുളിക്കുന്നിതിനിടെ ഒഴുക്കില്‍ പെടുകയായിരുന്നു. തടയണയിലെ കോണ്‍ക്രീറ്റ് ഓവിനുള്ളില്‍ കുടുങ്ങിയ യുവാവിനെ നാട്ടുകാര്‍ ചേര്‍ന്ന് ഏറെ പണിപ്പെട്ടാണ് പുറത്തെടുത്തത്. വിവരമറിഞ്ഞ് പുതുക്കാട് നിന്ന് അഗ്നിരക്ഷസേനയും വെള്ളിക്കുളങ്ങര പോലീസും സ്ഥലത്തെത്തി. മൃതദേഹം ചാലക്കുടി താലൂക്ക് ആശുപത്രി മോര്‍ച്ചറിയില്‍. സൗദി അറേബ്യയിലായിരുന്ന നസീബ് മൂന്നാഴ്ച മുമ്പാണ് നാട്ടിലെത്തിയത്. നസീബും കുടുംബവും വരന്തരപ്പിള്ളിയിലെ വാടക വീട്ടിലായിരുന്നു താമസം. ഭാര്യ: ജംസീന. മക്കള്‍: മുഹമ്മദ് നസീര്‍, ഫാത്തിമത് നസ്രിയ.