വൈപ്പിൻ: ഈ മാസം 31ന് ശേഷം പെലാജിക് വലയുൾപ്പെടെയുള്ള നിരോധിത വലകൾ ഉപയോഗിക്കുന്ന യാനങ്ങൾക്കെതിരെ കർശന നടപടി. ലംഘിക്കുന്നവരെ കണ്ടെത്താൻ സെപ്റ്റംബർ ഒന്നു മുതൽ കടലിലും കരയിലുമായി എല്ലാത്തരം യാനങ്ങളിലും പരിശോധനകൾ ഉണ്ടാകും.
ചില യാനങ്ങൾ പെലാജിക് വല ഉപയോഗിക്കുന്നതിനെതുടർന്ന് കൊച്ചി തീരത്ത് കടലിലും കരയിലും സംഘർഷമുടലെടുത്ത സാഹചര്യത്തിൽ കോസ്റ്റൽ പോലീസ് എഐജി ജി. പൂങ്കഴലി വിളിച്ചു ചേർത്ത യോഗത്തിലാണ് തീരുമാനം. യോഗത്തിൽ ബോട്ടുടമകളും തൊഴിലാളി യൂണിയൻ പ്രതിനിധികളും ഫിഷറീസ് -പോലീസ് ഉദ്യോഗസ്ഥരും സംബന്ധിച്ചിരുന്നു.