മൂവാറ്റുപുഴ: പായിപ്ര മീരാസ് ഡിജിറ്റൽ പബ്ലിക് ലൈബ്രറിയുടെ നേതൃത്വത്തിൽ സഹോദരന്മാരായ ഡോ. പി.ബി സലീം, പി.ബി. നൂഹ് എന്നിവർ തങ്ങളുടെ പിതാവായ പി.കെ. ബാവയുടെ ഓർമയ്ക്കായി സ്വന്തം ഭൂമിയിൽ നിർമിച്ച സെവൻസ് ഫുട്ബോൾ ഗ്രൗണ്ട് നാടിന് സമർപ്പിച്ചു. ഗ്രൗണ്ടിന്റെ ഉദ്ഘാടനം ഡീൻ കുര്യാക്കോസ് എംപി നിർവഹിച്ചു. മോഹൻ ബഗാൻ ക്യാപ്റ്റനും ഇന്ത്യൻ ഗോളിയുമായ സുഭാഷിഷ് റോയ് ചൗധരി ചടങ്ങിൽ മുഖ്യാതിഥിയായിരുന്നു.
ഹൈദരാബാദ് എഫ്സി കളിക്കാരൻ മുഹമ്മദ് റാഫി, സന്തോഷ് ട്രോഫി താരം സലിം കുട്ടി തുടങ്ങിയ കായിക താരങ്ങളെയും, നാട്ടിലെ ആദ്യകാല ഫുട്ബോൾ താരങ്ങളെയും ചടങ്ങിൽ ആദരിച്ചു. സമാപന സമ്മേളനത്തിൽ പായിപ്ര പഞ്ചായത്ത് പ്രസിഡന്റ് പി.എം. അസീസ് അധ്യക്ഷത വഹിച്ചു. അസീസ് കുന്നപ്പിള്ളി, സിഐ കെ. ഉണ്ണികൃഷ്ണൻ, അധ്യാപിക സജിത, കെ.പി. രാമചന്ദ്രൻ തുടങ്ങിയവർ പ്രസംഗിച്ചു. ഗ്രാമീണ മേഖലയിലെ കുട്ടികൾക്ക് ആധുനിക സൗകര്യങ്ങളോടുകൂടിയ സ്പോർട്സ് അക്കാദമിയും പരിശീലനവും സ്ഥിരം മത്സരവേദിയും ലഭ്യമാക്കുകയാണ് ലക്ഷ്യം. ഇതിനായി 50 കുട്ടികളെ തെരഞ്ഞെടുത്തിട്ടുണ്ട്. മീരാസ് ഡിജിറ്റൽ പബ്ലിക് ലൈബ്രറി സംഘടിപ്പിച്ച അഖില കേരള സെവൻസ് ഫുട്ബോൾ ടൂർണമെന്റ് മത്സരത്തിലെ വിജയികൾക്ക് ചടങ്ങിൽ സമ്മാനങ്ങൾ നൽകി.