പാമ്പാടി: പഞ്ചായത്ത് പതിനെട്ടാം വാർഡിലെ തോട്ടപ്പള്ളി ഭാഗത്ത് അഞ്ച് ഏക്കർ വരുന്ന സ്ഥലത്തെ 800 അടി ഉയരത്തിലുള്ള മല ഇടിച്ചുനിരത്തുന്നു. സമീപത്തുള്ള വീടുകൾക്കും റോഡിനും ഭീഷണിയാണിത്. ഇപ്പോൾത്തന്നെ ചെറിയ മഴയത്ത് സമീപത്തുള്ള മരങ്ങൾ കടപുഴകി വീണു തുടങ്ങി.
പൊതുഅവധി ദിവസങ്ങളിലാണ് ഇടിച്ചുനിരത്തൽ തകൃതിയായി നടക്കുന്നത്. ദിവസങ്ങളായി മണ്ണെടുപ്പ് തുടർന്നുകൊണ്ടിരിക്കുകയാണെങ്കിലും റവന്യു, ജിയോളജി, പോലീസ് അധികാരികൾ അറിഞ്ഞമട്ടേയില്ല. മണർകാട് അരീപ്പറന്പ് ഭാഗങ്ങളിലും ഇതേ രീതിയിൽ മണ്ണെടുപ്പ് നടക്കുന്നതായി ആക്ഷേപമുണ്ട്. ജില്ലാ കളക്ടർക്ക് പരാതി നൽകാനും പാമ്പാടി വില്ലേജ് ഓഫീസിനു മുന്പിൽ ധർണ നടത്തുവാനുമുള്ള തയാറെടുപ്പിലാണ് നാട്ടുകാർ.