പെരുവ: ദീപിക വാര്‍ത്തയെത്തുടര്‍ന്ന് റോഡിലെ കുഴിയടച്ചു അധികൃതര്‍. ആധുനിക നിലവാരത്തില്‍ നിര്‍മിച്ച റോഡിലെ കുഴി അപകടക്കെണിയാകുന്നുവെന്ന് ദീപിക വാര്‍ത്തയാക്കിയതിന് പിന്നാലെ മുളക്കുളം പഞ്ചായത്ത് ഓഫീസിന് സമീപത്തെ കുഴിയടച്ചു അപകടം ഒഴിവാക്കുകയായിരുന്നു.
വാട്ടര്‍ അഥോറിറ്റിയാണ് കുഴികള്‍ കോണ്‍ക്രീറ്റ് ചെയ്തു അടച്ചത്. ആലപ്പുഴ-മധുര സംസ്ഥാന ഹൈവേയില്‍ മുളക്കുളം പഞ്ചായത്ത് ഓഫീസിന് സമീപമാണ് വലിയ കുഴി അപകട ഭീഷണി ഉയര്‍ത്തിയത്.
ഇരുചക്രവാഹന യാത്രക്കാരാണ് കുഴിയില്‍ വീണ് അപകടത്തില്‍പ്പെട്ടത്. മികച്ച നിലയില്‍ ടാറിംഗ് നടത്തിയ റോഡിലൂടെ വേഗതയിലെത്തുന്ന ഇരുചക്രവാഹന യാത്രക്കാരുടെ ശ്രദ്ധയില്‍ കുഴിപെടുന്നത് തൊട്ടടുത്തെത്തുന്പോഴായിരുന്നു. വാട്ടര്‍ അതോറിറ്റിയുടെ പൈപ്പ് പൊട്ടിയത് നന്നാക്കിയ സ്ഥലത്താണ് കുഴി രൂപപെട്ടിരുന്നത്. ഇതു കോണ്‍ക്രീറ്റ് ചെയ്‌തെതെങ്കിലും ഒരാഴ്ച്ചയ്ക്കുള്ളില്‍ ഇളകിപോയി വലിയ കുഴിയാവുകയായിരുന്നു. കൂടാതെ ഈ ഭാഗങ്ങളില്‍ വേറേ സ്ഥലത്തും പൈപ്പ് പൊട്ടി ടാര്‍ ഇളകിപോയ നിലയിലാണ്.