മണിയംകുന്ന്: പൂഞ്ഞാര്‍ ഗ്രാമപഞ്ചായത്തില്‍ ജലവിതരണം നിലച്ചിട്ട് അഞ്ചുദിവസം കഴിഞ്ഞു. ഈ വിഷയത്തില്‍ പഞ്ചായത്തോ വാട്ടര്‍ അഥോറിട്ടിയോ അനങ്ങുന്നില്ല. പമ്പ്ഹൗസില്‍ പമ്പിംഗ് നിര്‍ത്തിയിട്ട് ഒരാഴ്ചയായിട്ടും അധികാരികളാരും ഈ മേഖലയിലേക്ക് തിരിഞ്ഞുനോക്കുന്നില്ല.
പാലാ വാട്ടര്‍ അഥോറിട്ടിയുടെ കീഴിലുള്ള പൂഞ്ഞാര്‍ തെക്കേക്കര വാട്ടര്‍ സപ്ലൈ സ്‌കീം എന്ന പേരിലുള്ള ജലവിതരണ പദ്ധതി പൂഞ്ഞാര്‍ ഗ്രാമപഞ്ചായത്തിലെ ശുദ്ധജലക്ഷാമം പരിഹരിക്കുന്നതിനായി വേള്‍ഡ് ബാങ്കിന്‍റെ കൂടി ധനസഹായത്തോടെ നടപ്പിലാക്കിയിട്ടുള്ളതാണ്. കുടിവെള്ളമില്ലാതെ ജനങ്ങള്‍ വലയുമ്പോഴും പഞ്ചായത്ത്, വാട്ടര്‍ അഥോറിറ്റി അധികൃതർ ഈ പ്രദേശത്തുകൂടി ഇതെല്ലാം കണ്ടു കടന്നുപോകുന്നുണ്ട്. എന്നാല്‍ ഒരു പരിഹാരം കണ്ടെത്താന്‍ ഇവരാരും തയാറാകുന്നില്ല. നിരവധി പരാതികള്‍ കൊടുത്തെങ്കിലും അധികൃതർക്ക് യാതൊരു കുലുക്കവുമില്ല.