പൂഞ്ഞാർ: കലാസൂര്യ പൂഞ്ഞാർ കൂട്ടായ്മയുടെ ഉദ്ഘാടനം കൈതപ്രം ദാമോദരൻ നമ്പൂതിരി നിർവഹിച്ചു. വിഷ്ണുപ്രിയ പൂഞ്ഞാർ രചിച്ച "താഴ്ന്നു പറക്കാത്ത പക്ഷി' എന്ന കവിതാ സമാഹാരം കേരള സംഗീത നാടക അക്കാഡമി സെക്രട്ടറി കരിവെള്ളൂർ മുരളി പ്രകാശനം ചെയ്തു. സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിച്ചു. വിശിഷ്ട വ്യക്തികൾക്ക് പൂഞ്ഞാറിന്റെ ആദരവ് പഞ്ചായത്ത് പ്രസിഡന്റ് ഗീതാ നോബിൾ നൽകി. രമേഷ് വെട്ടിമറ്റം, താലൂക്ക് ലൈബ്രറി കൗൺസിൽ സെക്രട്ടറി റോയി ഫ്രാൻസിസ്, ജയകുമാർ ചെങ്ങമനാട്, ലൈബ്രറി ട്രസ്റ്റ് ജനറൽ സെക്രട്ടറി അശോക് വർമ രാജ, വി.കെ. ഗംഗാധരൻ, കെ.ആർ. പ്രമോദ് തുടങ്ങിയവർ പ്രസംഗിച്ചു.