അമ്പലപ്പുഴ: ആലപ്പുഴ മെഡിക്കൽ കോളജ് ആശുപത്രിയിലെ ശുചിമുറിയിൽ ഒളികാമറ വച്ച ജീവനക്കാരനെ പോലീസ് കസ്റ്റഡിയിലെടുത്തു. ആറാട്ടുപുഴ രാമങ്കരി സുനിൽ ഭവനത്തിൽ സുനിലാലി(45)നെയാണ് അമ്പലപ്പുഴ പോലീസ് കസ്റ്റഡിയിലെടുത്തത്. ദേശീയ ആരോഗ്യ ദൗത്യം (എൻഎച്ച്എം) താത്കാലിക ജീവനക്കാരനാണ് സുനിലാൽ.
ആശുപത്രി ജീവനക്കാർ ഉപയോഗിക്കുന്ന ശുചിമുറിയിലാണ് ഇയാൾ മൊബൈൽ ഫോൺ കാമറ സ്ഥാപിച്ചത്. സംശയം തോന്നിയ ഡോക്ടർ ഇയാളെ നിരീക്ഷിക്കുകയും അശുപത്രി അധികൃതരെ വിവരം അറിയിക്കുകയുമായിരുന്നു. തുടർന്നു നടത്തിയ സിസിടിവി പരിശോധനയിൽ ഇയാളാണ് മൊബൈൽ കാമറ സ്ഥാപിച്ചതെന്നു കണ്ടെത്തിയതിനെ ത്തുടർന്ന് വിവരം പോലീസിൽ അറിയിക്കുകയായിരുന്നു. തുടർന്ന് പോലീസ് സംഘം ആശുപത്രിയിലെത്തി കസ്റ്റഡിയിലെടുത്ത് ഇയാൾക്കെതിരേ കേസെടുത്തു.