ചെറുപുഴ: നരമ്പിൽ ഗവ. എൽപി സ്കൂളിൽ പിറന്നാൾ ഊണും പുസ്തക പത്തായവും സംഘടിപ്പിച്ചു. രക്ഷിതാക്കളും അധ്യാപകരും ചേർന്ന് സ്കൂളിലെ അഞ്ചു വിദ്യാർഥികളുടെ ജന്മദിനം സ്കൂളിൽ ഒന്നിച്ച് ആഘോഷിച്ചു. പിറന്നാൾ സമ്മാനമായി കുട്ടികൾക്ക് പുസ്തകങ്ങളും നൽകി. ഫാത്തിമത്ത് ഷഹാന, ഫാത്തിമ ചെറുകുന്ന്, ഷസ നസ്രീൻ, കെ.കെ. ഇബ്രാഹിം, മിൻഹ ഫാത്തിമ എന്നിവരുടെ ജന്മദിനമാണ് ആഘോഷിച്ചത്.
തുടർന്ന് സ്കൂളിലെ മുഴുവൻ കുട്ടികൾക്കും പിറന്നാൾ ഊണും നൽകി. ഇതോടനുബന്ധിച്ച് പുസ്തക പത്തായത്തിന്റെ ഉദ്ഘാടനവും നടന്നു. പെരിങ്ങോം-വയക്കര പഞ്ചായത്ത് വൈസ് പ്രസിഡന്റ് ബിന്ദു രാജൻകുട്ടി ഉദ്ഘാടനം നിർവഹിച്ചു. കുട്ടികളിൽ വായന പ്രോൽസാഹിപ്പിക്കുക എന്ന ലക്ഷ്യത്തോടെയാണ് പൂട്ടില്ലാത്ത പുസ്തക പത്തായം സ്കൂളിൽ ഒരുക്കിയത്. മുഖ്യാധ്യാപകൻ സി.വി. ബാബു അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർമാൻമാരായ കെ. കമലാക്ഷൻ, പി. രവീന്ദ്രൻ, ഫാത്തിമ ബീവി, പഞ്ചായത്തംഗങ്ങളായ എ.വി. ബിന്ദു, സ്കൂൾ സീനിയർ അസിസ്റ്റന്റ് എസ്. ഷീജ, എസ്എംസി ചെയർമാൻ എം. വിനോദ് കുമാർ, മദർ പിടിഎ പ്രസിഡന്റ് പി.പി. സുരമ്യ എന്നിവർ പ്രസംഗിച്ചു.