പയ്യാവൂർ: മദർ തെരേസയുടെ ജന്മദിനം സംസ്ഥാന സർക്കാർ അനാഥ-അഗതി ദിനമായി ആചരിക്കുന്നതിന്റെ ജില്ലാതല ഉദ്ഘാടനം പയ്യാവൂർ വെന്പുവയിലെ അഗതി സംരക്ഷണ കേന്ദ്രമായ തെരേസ ഭവനിൽ നടന്നു. സാമൂഹ്യനീതി വകുപ്പിന്റെയും ഓർഫനേജ് കൺട്രോൾ ബോർഡിന്റെയും സംയുക്താഭിമുഖ്യത്തിൽ നടത്തിയ ദിനാചരണം അസി. കളക്ടർ ഗ്രന്ഥെ സായികൃഷ്ണ ഉദ്ഘാടനം ചെയ്തു. മറ്റുള്ളവർക്ക് കൂടി വേണ്ടിയല്ലാതെയുളള ജീവിതം ജീവിതമല്ലെന്നും നല്ല പ്രവർത്തികൾക്കാണ് വാക്കുകളേക്കാൾ പ്രാധാന്യം നൽകേണ്ടതെന്നും ഗ്രന്ഥേ സായികൃഷ്ണ പറഞ്ഞു.
ഏരുവേശി പഞ്ചായത്ത് പ്രസിഡന്റ് മിനി ഷൈബി അധ്യക്ഷത വഹിച്ചു. ഓർഫനേജ് കൺട്രോൾ ബോർഡ് മെംബർ സിസ്റ്റർ വിനീത ഡിഎസ്എസ് മുഖ്യാതിഥിയായിരുന്നു. ജില്ലാ സാമൂഹിക നീതി ഓഫീസർ പി. ബിജു ആമുഖ പ്രഭാഷണവും വെമ്പുവ ഇടവക വികാരി ഫാ.ജോർജ് എളൂക്കുന്നേൽ മദർ തെരേസ അനുസ്മരണ പ്രഭാഷണവും നടത്തി. ഏരുവേശി പഞ്ചായത്ത് മുൻ പ്രസിഡന്റ് ടെസി ഇമ്മാനുവൽ, പി.കെ. നാസർ, എം.ജെ. സ്റ്റീഫൻ, തെരേസ ഭവൻ ഡയറക്ടർ ബ്രദർ ടി.കെ. സജി എന്നിവർ പ്രസംഗിച്ചു. വിവിധ ക്ഷേമ സ്ഥാപനങ്ങളിലെ അന്തേവാസികൾ അവതരിപ്പിച്ച കലാപരിപാടികളും അരങ്ങേറി.