കണ്ണൂര്: ശ്രീകൃഷ്ണ ജയന്തിയോടനുബന്ധിച്ച് ബാലഗോകുലത്തിന്റെ ആഭിമുഖ്യത്തില് ശോഭായാത്രകൾ സംഘടിപ്പിച്ചു. കണ്ണൂരിൽ വിളക്കുംതറ മൈതാനിയിൽ നിന്നാരംഭിച്ച ശോഭായാത്ര അമൃതാനന്ദമയീ കണ്ണൂർ മഠാധിപതി സ്വാമി അമൃതകൃപാനന്ദപുരി ഉദ്ഘാടനം ചെയ്തു. ഉണ്ണിക്കണ്ണൻമാർ, ഗോപികമാർ എന്നിവർ അണിനിരന്നു. നിശ്ചല ദൃശ്യങ്ങൾ, പ്ലോട്ടുകൾ എന്നിവയും ഒരുക്കിയിരുന്നു. ശോഭായാത്ര തെക്കിബസാറിൽ സമാപിച്ചു.
ഇരിട്ടി ഉൾപ്പെടെയുള്ള മലയോര മേഖലയിലും ശോഭായാത്രകൾ നടന്നു. ഇരിട്ടിയിൽ വിവിധ മേഖലകളിൽ നിന്നുള്ള ശോഭായാത്രകൾ സംഗമിച്ച് മഹാശോഭായാത്രയായി സമാപിച്ചു. ബാലഗോകുലം മട്ടന്നൂർ താലൂക്ക് ആഘോഷ സമിതിയുടെ നേതൃത്വത്തിൽ അഞ്ച് കേന്ദ്രങ്ങളിൽ മഹാശോഭായാത്രയും 19 കേന്ദ്രങ്ങളിൽ ശോഭായാത്രകളും നടത്തി. തളിപ്പറമ്പിൽ ചിറവക്ക് നിന്നും ആരംഭിച്ച ശോഭായാത്രാ നഗരം ചുറ്റി തൃച്ചംബരം ശ്രീകൃഷ്ണ ക്ഷേത്രത്തിൽ സമാപിച്ചു.