ആറ്റിങ്ങൽ: ആലംകോട് മണനാക്ക് റോഡിൽ ഗുരുനാഗപ്പൻകാവ് ജംഗ്ഷനു സമീപം മീൻ ലോറിയും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. പെരുംകുളം കണ്ണങ്കര ചരുവിള പുത്തൻ വീട്ടിൽ രവീന്ദ്രന്റെ മകൻ വിനോദ് (43) ആണ് മരിച്ചത്.
കഴിഞ്ഞ ദിവസം രാത്രി 8.45ഓടെയായിരുന്നു അപകടം. മണനാക്ക് ഭാഗത്തുനിന്നും വന്ന മീൻ ലോറിയും എതിരെ വന്ന ബൈക്കുമാണ് കൂട്ടിയിടിച്ചത്. അപകടത്തിൽ ലോറി ഡ്രൈവർക്കും പരിക്കേറ്റിട്ടുണ്ട്. പോലീസ് തുടർനടപടികൾ സ്വീകരിച്ചു.