കൽപ്പറ്റ: പുഞ്ചിരിമട്ടം ഉരുൾപൊട്ടൽ ദുരന്തബാധിത കുടുംബങ്ങൾക്ക് സാന്ത്വനമേകാൻ ’ഒപ്പം ചിരിക്കാം’ പദ്ധതിയുമായി ജില്ലാ പോലീസ്. പോലീസ് ഉദ്യോഗസ്ഥരും കൗണ്സലർമാരും സ്റ്റുഡന്റ് പോലീസ് കാഡറ്റുകളും അടങ്ങുന്ന സംഘം ദുരന്തബാധിതരുടെ താമസസ്ഥലങ്ങളിലെത്തി സാന്ത്വനം പകരുന്നതാണ് പദ്ധതി.
കഴിഞ്ഞ ദിവസം 24 വീടുകളിൽ സന്ദർശനം നടത്തി. ദുരന്തത്തിന്റെ ആഘാതത്തിൽ തളർന്ന കുടുംബാംഗങ്ങൾക്കു ആത്മവിശ്വാസം പകർന്നു.
ജില്ലാ പോലീസ് മേധാവി തപോഷ് ബസുമതാരിയുടെ നിർദേശ പ്രകാരം ആവിഷ്കരിച്ചതാണ് ’ഒപ്പം ചിരിക്കാം’പദ്ധതി. അഡീഷണൽ എസ്പിയും സോഷ്യൽ പോലീസ് ക്യാപ്പ് പദ്ധതി ജില്ലാ നോഡൽ ഓഫീസറുമായ വിനോദ് പിള്ള, ഡിവൈഎസ്പിമാരായ എം.കെ. ഭരതൻ(നാർകോടിക്), ദിലീപ്കുമാർ ദാസ്(ഡിസിആർബി), ക്യാപ്പ് പദ്ധതി അഡീഷണൽ നോഡൽ ഓഫീസർ കെ. മോഹൻദാസ്, പ്രോജക്ട് അസിസ്റ്റന്റ് ടി.കെ. ദീപ തുടങ്ങിയവർ നേതൃത്വം നൽകി. വരും ദിവസങ്ങളിലും സന്ദർശനം തുടരുമെന്ന് ജില്ലാ പോലീസ് മേധാവി അറിയിച്ചു.