നിലമ്പൂര്: അകമ്പാടം യുവധാര ആര്ട്സ് ആന്ഡ് സ്പോര്ട്സ് ക്ലബ് ഫുട്ബോള് താരങ്ങളെ അനുമോദിച്ചു. ജില്ലാ ഫുട്ബോള് അസോസിയേഷന് ഡിവിഷന് ചാമ്പ്യന്മാരായ യുവധാര ടീമംഗങ്ങളെയും മുന്കാല ഫുട്ബോള് താരങ്ങളെയുമാണ് ആദരിച്ചത്. ഗ്രാമപഞ്ചായത്ത് മുന് പ്രസിഡന്റും ആദ്യകാല ഫുട്ബോള് താരവുമായ പി.ടി. ഉസ്മാന് ആദരിക്കല് ചടങ്ങ് ഉദ്ഘാടനം ചെയ്തു.
ക്ലബ് പ്രസിഡന്റ് ചെറി അധ്യക്ഷത വഹിച്ചു. നിലമ്പൂര് ബ്ലോക്ക് പഞ്ചായത്തംഗം സഹില് അകമ്പാടം, കൂറ്റിരി അസീസ്, ക്ലബ് സെക്രട്ടറി ഷാനവാസ് കളത്തില്, സൂര്യപ്രകാശ്, റഷീദ്, യംഗ് ഫൈറ്റേഴ്സ് ക്ലബ് പ്രസിഡന്റ് ഷറഫുദ്ദീന് ഇല്ലിക്കല് എന്നിവര് പ്രസംഗിച്ചു.
ചടങ്ങില് യുവധാരയുടെ പഴയകാല താരങ്ങളായ അച്ചു, കൊമ്പന് ഉമ്മര്, പി.ടി. ഉസ്മാന്, ക്ലബ് രക്ഷാധികാരി പി.കെ. രായിന്, റിട്ട. മിലിട്ടറി ഉദ്യോഗസ്ഥരായ കുറ്റീരി അസീസ്, തോപ്പില് ഉസ്മാന്, മുന് സന്തോഷ് ട്രോഫി താരം പി.കെ. നസീബ് എന്നിവരെ പൊന്നാട അണിയിച്ച് അനുമോദിച്ചു. നിരവധി ഫുട്ബോള് താരങ്ങള്ക്ക് ജന്മം നല്കിയ ചാലിയാര് പഞ്ചായത്തില് കായിക മൈതാനമില്ല. സ്വകാര്യവ്യക്തി പഞ്ചായത്തിന് സൗജന്യമായി നല്കിയ മൈതാനം ഉടന് യാഥാര്ഥ്യമാക്കണമെന്നും ചടങ്ങില് പ്രസംഗിച്ചവര് ചൂണ്ടിക്കാട്ടി. ബ്ലോക്ക് പഞ്ചായത്തംഗം സഹില് അകമ്പാടം അനുവദിച്ച 20 ലക്ഷം രൂപ മാത്രമാണ് മൈതാന നിര്മാണത്തിന് ലഭ്യമായിട്ടുള്ളത്.