സഞ്ജയ് ദത്ത് കീഴടങ്ങി
Thursday, May 16, 2013 3:07 PM IST
മുംബൈ: 1993ലെ മുബൈ സ്ഫോടനക്കേസില്‍ ശിക്ഷിക്കപ്പെട്ട ബോളിവുഡ് താരം സഞ്ജയ് ദത്ത് ടാഡ കോടതിയില്‍ കീഴടങ്ങി. യെര്‍വാദ ജയിലില്‍ കീഴടങ്ങാന്‍ അനുവദിക്കണമെന്നാവശ്യപ്പെട്ട് അഭിഭാഷകന്‍ സുഭാഷ് യാദവ് മുഖേന നല്കിയ അപേക്ഷ സഞ്ജയ്ദത്ത് ബുധനാഴ്ച പിന്‍വലിച്ചതിനെത്തുടര്‍ന്നാണിത്.

ദത്തിന്റെ കീഴടങ്ങലിനോടനുബന്ധിച്ച് ടാഡാ കോടതിയിലും പൂനെ യെര്‍വാഡാ ജയിലിലും കനത്ത സുരക്ഷയാണ് ഏര്‍പ്പെടുത്തിയിരുന്നത്. അതേസമയം ഒരു മാസത്തേക്കു വീട്ടില്‍ നിന്നുള്ള ഭക്ഷണവും കിടക്കയും ജയിലില്‍ ഉപയോഗിക്കാന്‍ കോടതി സഞ്ജയ് ദത്തിനെ അനുവദിച്ചിട്ടുണ്ട്. ഇലക്ട്രോണിക് സിഗരറ്റ് അനുവദിക്കണമെന്ന അപേക്ഷ കോടതി തള്ളിയിരുന്നു.

അനധികൃതമായി ആയുധങ്ങള്‍ കൈവശംവച്ച കേസില്‍ അഞ്ചു വര്‍ഷമാണ് ദത്തിനു തടവുശിക്ഷ വിധിച്ചത്. ഒന്നരവര്‍ഷം ശിക്ഷ അനുഭവിച്ചതിനാല്‍ ബാക്കി ശിക്ഷ അനുഭവിക്കാന്‍ കീഴടങ്ങാനാണു കോടതി നിര്‍ദേശിച്ചതെങ്കിലും ഏറ്റെടുത്ത സിനിമകള്‍ പൂര്‍ത്തിയാക്കാനുള്ളതുകൊണ്ടു നാലാഴ്ചത്തെ സമയം സഞ്ജയ് ദത്ത് ചോദിച്ചിരുന്നു. ഇതു സുപ്രീംകോടതി തള്ളിയിരുന്നു.