മും​ബൈ: ബോ​ളി​വു​ഡ് ന​ട​ൻ സ​ൽ​മാ​ൻ ഖാ​നു നേ​രെ വ​ധ​ഭീ​ഷ​ണി സ​ന്ദേ​ശം അ​യ​ച്ച കേ​സി​ൽ വ​ൻ വ​ഴി​ത്തി​രി​വ്. സ​ൽ​മാ​ൻ ഖാ​ന്‍റെ ചി​ത്ര​ത്തി​ലെ ഗാ​ന​ര​ചയിതാ​വാ​ണ് ബി​ഷ്ണോ​യ് സം​ഘ​ത്തി​ൽ​നി​ന്നെ​ന്ന വ്യാ​ജേ​ന താരത്തിനെതി​രേ വ​ധ​ഭീ​ഷ​ണി മു​ഴ​ക്കി​യ​തി​ന് അ​റ​സ്റ്റി​ലാ​യ​ത്.

ഇരുപത്തിനാലുകാര​നാ​യ സൊ​ഹൈ​ൽ പാ​ഷ ക​ർ​ണാ​ട​ക​യി​ലെ റാ​യ്ച്ചു​രി​ൽ നി​ന്നാ​ണ് അ​റ​സ്റ്റി​ലാ​യ​ത്. സ​ൽ​മാ​ൻ ഖാ​ന്‍റെ പു​തി​യ ചി​ത്ര​ത്തി​ലെ ‘മേ ​സി​ക്ക​ന്ദ​ർ ഹൂം’ ​എ​ന്ന പാ​ട്ടി​ന്‍റെ ര​ച​യി​താ​വാ​ണ് സൊ​ഹൈ​ൽ. പാ​ട്ട് വൈ​റ​ലാ​കാ​നും, ത​നി​ക്ക് പ്ര​ശ​സ്തി കി​ട്ടാ​നു​മാ​ണ് പാ​ഷ ഭീ​ഷ​ണി അ​യ​ച്ച​തെ​ന്ന് പോ​ലീ​സ് പ​റ​ഞ്ഞു.

ന​വം​ബ​ർ ഏ​ഴി​നാ​ണ് മും​ബൈ പോ​ലീ​സി​ന്‍റെ വാ​ട്‌​സ്ആ​പ് ഹെ​ൽ​പ്‌​ലൈ​നി​ൽ ഭീ​ഷ​ണി സ​ന്ദേ​ശം ല​ഭി​ച്ച​ത്. അ​ഞ്ചു​കോ​ടി രൂ​പ ന​ൽ​കി​യി​ല്ലെ​ങ്കി​ൽ ബി​ഷ്ണോ​യി​യെ​ക്കു​റി​ച്ച് പ​രാ​മ​ർ​ശ​മു​ള്ള "മേ ​സി​ക്ക​ന്ദ​ർ ഹൂം' ​എ​ന്ന ഗാ​ന​ത്തി​ന്‍റെ ഗാ​ന​ര​ച​യി​താ​വി​നെ​യും സ​ല്‍​മാ​ന്‍ ഖാ​നെ​യും വ​ധി​ക്കു​മെ​ന്ന​യി​രു​ന്നു. ഗാ​ന​ര​ചി​താ​വി​നെ ഇ​നി പാ​ട്ടെ​ഴു​താ​ൻ പ​റ്റാ​ത്ത അ​വ​സ്ഥ​യി​ലാ​ക്കു​മെ​ന്നും സ​ൽ​മാ​ൻ ഖാ​ന് ധൈ​ര്യ​മു​ണ്ടെ​ങ്കി​ൽ അ​വ​രെ ര​ക്ഷി​ക്ക​ണ​മെ​ന്നും ഭീ​ഷ​ണി സ​ന്ദേ​ശ​ത്തി​ൽ പ​റ​യു​ന്നു.

തു​ട​ർ​ന്ന് ന​ട​ത്തി​യ അ​ന്വേ​ഷ​ണ​ത്തി​ൽ റാ​യ്ച്ചു​രി​ലു​ള്ള വെ​ങ്ക​ടേ​ഷ് നാ​രാ​യ​ൺ എ​ന്ന​യാ​ളി​ന്‍റെ ഫോ​ണി​ൽ നി​ന്നാ​ണ് സ​ന്ദേ​ശം വ​ന്ന​തെ​ന്ന് ക​ണ്ടെ​ത്തി. കൂ​ടു​ത​ൽ ചോ​ദ്യം ചെ​യ്ത​പ്പോ​ഴാ​ണ് ന​വം​ബ​ർ മൂ​ന്നി​ന് ഒ​രു അ​പ​രി​ചി​ത​ൻ ഒ​രു മാ​ർ​ക്ക​റ്റി​ൽ വ​ച്ച് കോ​ൾ ചെ​യ്യാ​ൻ ത​ന്‍റെ ഫോ​ൺ വാ​ങ്ങി​യി​രു​ന്ന കാ​ര്യം അ​ദ്ദേ​ഹം പ​റ​ഞ്ഞ​ത്.

തു​ട​ര്‍​ന്ന് സൈ​ബ​ര്‍ സെ​ല്ലി​ന്‍റെ സ​ഹാ​യ​ത്തോ​ടെ ന​ട​ത്തി​യ അ​ന്വേ​ഷ​ണ​ത്തി​ല്‍ മും​ബൈ ക്രൈം​ബ്രാ​ഞ്ച് സം​ഘം റാ​യ്ച്ചു​രി​ന​ടു​ത്ത് മാ​ന​വി ഗ്രാ​മ​ത്തി​ൽ വ​ച്ച് പാ​ഷ​യെ ക​ണ്ടെ​ത്തു​ക​യാ​യി​രു​ന്നു. അ​റ​സ്റ്റ് ചെ​യ്ത് കോ​ട​തി​യി​ലെ​ത്തി​ച്ച ഇ​യാ​ളെ ര​ണ്ടു ദി​വ​സ​ത്തേ​ക്ക് പോ​ലീ​സ് ക​സ്റ്റ​ഡി​യി​ൽ വി​ട്ടു.