റോഡ് മുറിച്ചുകടക്കുന്നതിനിടെ ബസിടിച്ച് അപകടം; വീട്ടമ്മ മരിച്ചു
Friday, August 30, 2024 3:19 PM IST
ആലപ്പുഴ: അരൂര് ദേശീയപാതയില് വീണ്ടും അപകടം. റോഡ് മുറിച്ചുകടക്കുന്നതിനിടെ വീട്ടമ്മ ബസിടിച്ച് മരിച്ചു. എഴുപുന്ന സ്വദേശി മല്ലിക അജയന് ആണ് മരിച്ചത്.
ഉച്ചയ്ക്ക് ഒന്നോടെ അരൂര് ക്ഷേത്രം കവലയിലാണ് അപകടം. റോഡ് മുറിച്ച് കടക്കുന്നതിനിടെ വൈറ്റില ഭാഗത്തുനിന്ന് വന്ന ബസ് ഇവരെ ഇടിച്ചുവീഴ്ത്തുകയായിരുന്നു. ഇവരുടെ ശരീരത്തിലൂടെ ബസിന്റെ പിന്ചക്രങ്ങള് കയറിയിറങ്ങി.
ബസ് അമിത വേഗതയിലായിരുന്നെന്നാണ് നിഗമനം. റോഡ് നിര്മാണം നടക്കുന്ന മേഖലയിൽ ഗതാഗത നിയന്ത്രണം കാര്യക്ഷമമല്ലാത്തതും അപകടത്തിന് കാരണമായെന്ന് വിമർശനമുയരുന്നുണ്ട്. പ്രദേശത്ത് വിവിധ അപകടങ്ങളിലായി 30ഓളം പേര്ക്കാണ് ജീവന് നഷ്ടമായത്.