ഹരിയാനയിൽ എംപിമാരെ മത്സരിപ്പിക്കില്ലെന്ന് ബാബറിയ
Thursday, August 29, 2024 2:59 AM IST
ന്യൂഡൽഹി: ഹരിയാന നിയമസഭാ തെരഞ്ഞെടുപ്പിൽ ലോക്സഭയിലെയോ രാജ്യസഭയിലെയോ എംപിമാരെ മത്സരിപ്പിക്കില്ലെന്ന് സംസ്ഥാനത്തിന്റെ ചുമതലയുള്ള എഐസിസി നേതാവ് ദീപക് ബാബറിയ.
കുമാരി സെൽജ, രൺദീപ് സിംഗ് സുർജേവാല എന്നീ മുതിർന്ന നേതാക്കൾ നിയമസഭാ തെരഞ്ഞെടുപ്പിൽ മത്സരിക്കാൻ താത്പര്യം പ്രകടിപ്പിച്ച സാഹചര്യത്തിലാണു ബാബറിയ കോൺഗ്രസ് നിലപാട് വ്യക്തമാക്കിയത്.
സിർസയിൽനിന്നുള്ള ലോക്സഭാംഗമാണ് സെൽജ. രാജ്യസഭാംഗമാണു രൺദീപ് സിംഗ് സുർജേവാല. ഇരു നേതാക്കളും മുൻ മുഖ്യമന്ത്രി ഭൂപീന്ദർ സിംഗ് ഹൂഡയുടെ എതിർ ചേരിയിലുള്ളവരാണ്.
90 അംഗ ഹരിയാന നിയമസഭയിലേക്ക് ഒക്ടോബർ ഒന്നിനാണു തെരഞ്ഞെടുപ്പ് നടക്കുക. ഒക്ടോബർ നാലിനു വോട്ടെണ്ണും. പത്തു വർഷമായി ബിജെപിയാണു ഹരിയാനയിൽ അധികാരത്തിലുള്ളത്.