ഇന്ത്യൻ ഓവര്സീസ് കോണ്ഗ്രസ് ചെയര്മാനായി സാം പിത്രോദയെ വീണ്ടും നിയമിച്ചു
Wednesday, June 26, 2024 10:30 PM IST
ന്യൂഡൽഹി : ഇന്ത്യൻ ഓവര്സീസ് കോണ്ഗ്രസ് ചെയര്മാനായി സാം പിത്രോദയെ വീണ്ടും തെരഞ്ഞെടുത്തു. ലോക്സഭാ തെരഞ്ഞെടുപ്പ് സമയത്ത് സാം പിത്രോദ നടത്തിയ വിവാദ പരാമർശത്തെ തുടർന്ന് ഇദ്ദേഹത്തെ സ്ഥാനത്തു നിന്ന് കോൺഗ്രസ് മാറ്റിയിരുന്നു.
പിന്തുടര്ച്ച സ്വത്ത് വിവാദം, ഇന്ത്യക്കാരുടെ വൈവിധ്യം ഉന്നയിച്ചുള്ള പിത്രോദയുടെ പരാമര്ശം തെരഞ്ഞെടുപ്പില് ബിജെപി ആയുധമാക്കിയിരുന്നു. പരാമര്ശങ്ങള് വിവാദമായതോടെ അദ്ദേഹം ഇന്ത്യൻ ഓവര്സീസ് കോണ്ഗ്രസ് ചെയര്മാൻ സ്ഥാനം രാജിവയ്ക്കുകയായിരുന്നു.
വടക്കുകിഴക്കൻ മേഖലയിലുള്ളവർ ചൈനക്കാരെ പോലെയാണെന്നും തെക്കേയിന്ത്യയിലുള്ളവര് ആഫ്രിക്കക്കാരെ പോലെയുമാണ് സാം പിത്രോദയുടെ പ്രസ്താവനയാണ് ലോക്സഭ തെരഞ്ഞെടുപ്പിനിടെ വിവാദമായത്. പടിഞ്ഞാറുള്ളവർ അറബികളെ പോലെയും വടക്കുള്ളവർ യൂറോപ്പുകാരെപോലെ ആണെന്നും പിത്രോദ പറഞ്ഞിരുന്നു.