ട്രെയിനിന്റെ ബര്ത്ത് തകര്ന്നുവീണ് അപകടം; ചികിത്സയിലായിരുന്ന വയോധികന് മരിച്ചു
Wednesday, June 26, 2024 9:29 AM IST
മലപ്പുറം: ട്രെയിന് യാത്രയ്ക്കിടെ ബര്ത്ത് തകര്ന്നുവീണ് പരിക്കേറ്റ് ചികിത്സയിലായിരുന്ന വയോധികന് മരിച്ചു. മലപ്പുറം പൊന്നാനി മാറഞ്ചേരി സ്വദേശി മാറാടിക്കല് അലി ഖാന്(62) ആണ് മരിച്ചത്.
ചൊവ്വാഴ്ച ഡല്ഹിയിലേക്കുള്ള ട്രെയിന് യാത്രയ്ക്കിടെ തെലങ്കാനയ്ക്ക് സമീപമുള്ള വാറംഗലില് വച്ചായിരുന്നു അപകടം. മുകളിലുള്ള ബര്ത്ത് ഒടിഞ്ഞ് ദേഹത്തേക്ക് വീഴുകയായിരുന്നു.
ഗുരുതരമായി പരിക്കേറ്റ ഇയാളെ ഉടനെ സമീപത്തെ ആശുപത്രിയിലേക്ക് മാറ്റിയിരുന്നു. ഇവിടെ ചികിത്സയിലിരിക്കെയാണ് മരണം. മൃതദേഹം പൊന്നാനിയിലെ വീട്ടിലെത്തിച്ചിട്ടുണ്ട്.