മഹാവികാസ് അഘാടിയില് എല്ലാവരും തുല്യര്; ശരദ് പവാറിന് മറുപടിയുമായി സഞ്ജയ് റാവത്ത്
Saturday, June 22, 2024 7:44 PM IST
മുംബൈ: മഹാരാഷ്ട്ര നിയമസഭ തെരഞ്ഞെടുപ്പിനുള്ള മഹാവികാസ് അഘാടിയുടെ സീറ്റ് വിഭജന ചര്ച്ചകള് തുടങ്ങിയിട്ടില്ലെന്നും സഖ്യത്തിലെല്ലാവരും തുല്യരാണെന്നും ശിവസേന-യുബിടി നേതാവ് സഞ്ജയ് റാവത്ത്. സീറ്റ് വിഭജനത്തില് എല്ലാവര്ക്കും അര്ഹമായ സീറ്റുകള് ലഭിക്കുമെന്നും അദ്ദേഹം വ്യക്തമാക്കി.
നിയമസഭ തെരഞ്ഞെടുപ്പില് എന്സിപി-എസ്പി കൂടുതല് സീറ്റുകള് ആവശ്യപ്പെടുമെന്ന പാര്ട്ടി അധ്യക്ഷന് ശരദ് പവാറിന്റെ പ്രസ്താവനയ്ക്ക് പിന്നാലെയാണ് റാവത്തിന്റെ പ്രതികരണം. പാര്ട്ടി പ്രവര്ത്തകര്ക്കും പാര്ട്ടിയുടെ ജനപ്രതിനിധികള്ക്കുമായി സംഘടിപ്പിച്ച യോഗത്തിലായിരുന്നു ശരദ് പവാറിന്റെ പ്രസ്താവന.
ലോക്സഭ തെരഞ്ഞെടുപ്പില് സംസ്ഥാനത്ത് ഏറ്റവും മികച്ച പ്രകടനം പുറത്തെടുത്ത പാര്ട്ടിയാണ് എന്സിപി-എസ്പി എന്നും റാവത്ത് പറഞ്ഞു. 10 സീറ്റുകളില് മത്സരിച്ച ശരദ് പവാറിന്റെ പാര്ട്ടി എട്ട് സിറ്റുകളില് വിജയിച്ചത് ചൂണ്ടികാട്ടിയായിരുന്നു അദ്ദേഹത്തിന്റെ പ്രതികരണം. ലോക്സഭ തെരഞ്ഞെടുപ്പിന് സമാനമായി നിയമസഭ തെരഞ്ഞെടുപ്പിലും സംസ്ഥാനത്ത് മഹാവികാസ്അഘാടി മികച്ച വിജയം നേടുമെന്നും ശിവസേന-യുബിടി നേതാവ് പറഞ്ഞു.