18 ആം ലോക്സഭയിൽ ഭർതൃഹരി മഹ്താബ് പ്രോടേം സ്പീക്കറാകും
Thursday, June 20, 2024 8:51 PM IST
ന്യൂഡൽഹി: പതിനെട്ടാം ലോക്സഭയുടെ പ്രഥമ സമ്മേളനത്തിൽ ഭർതൃഹരി മഹ്താബ് പ്രോടേം സ്പീക്കറാകും. രാഷ്ട്രപതി ദ്രൗപതി മുർമുവാണ് ഇത് സംബന്ധിച്ച് തീരുമാനമെടുത്തത്.
ഒഡീഷയിലെ കട്ടക്കിൽ നിന്നുള്ള എംപിയാണ് ഇദ്ദേഹം. ബിജെഡിയിൽ നിന്ന് ബിജെപിയിലെത്തിയ നേതാവാണ് ഭർതൃഹരി മഹ്താബ്. ലോക്സഭയിൽ സ്പീക്കർ തെരഞ്ഞെടുപ്പ് നിയന്ത്രിക്കേണ്ടത് പ്രോടേം സ്പീക്കറാണ്. ഈ മാസം 26 നാണ് ലോക്സഭയിൽ സ്പീക്കർ തെരഞ്ഞെടുപ്പ്.
മാവേലിക്കര എംപി കൊടിക്കുന്നിൽ സുരേഷിനെ ഒഴിവാക്കിക്കൊണ്ടാണ് ഭർതൃഹരി മഹ്താബിനെ പ്രോടേം സ്പീക്കറായി തീരുമാനിച്ചത്. ഏഴ് തവണയാണ് ഭർതൃഹരി മഹ്താബ് സഭയിലെത്തിയത്. നിലവിൽ എട്ട് തവണ ലോക്സഭയിലെത്തിയ കൊടിക്കുന്നിലാണ് മുതിർന്ന അംഗം.