"നയിക്കാൻ മുരളിയേട്ടൻ വരട്ടെ': പാലക്കാട്ടും മുരളീധരനെ അനുകൂലിച്ച് പോസ്റ്റർ
Thursday, June 13, 2024 10:33 AM IST
പാലക്കാട്: തിരുവനന്തപുരത്തിനു പിന്നാലെ പാലക്കാട്ടും കെ. മുരളീധരനെ അനുകൂലിച്ച് പോസ്റ്റർ പ്രത്യക്ഷപ്പെട്ടു. "നയിക്കാൻ മുരളിയേട്ടൻ വരട്ടെ' എന്നാണ് പോസ്റ്ററില് എഴുതിയിരിക്കുന്നത്.
പാലക്കാട് ഉപതെരഞ്ഞെടുപ്പിൽ യുഡിഎഫ് സ്ഥാനാർഥിയായി കെ. മുരളീധരൻ മത്സരിക്കണമെന്ന് വിവിധ കോണുകളിൽ നിന്ന് ആവശ്യമുയർന്നതിനു പിന്നാലെയാണ് നഗരത്തിന്റെ വിവിധ ഭാഗങ്ങളിൽ പോസ്റ്ററുകൾ പ്രത്യക്ഷപ്പെട്ടത്.
"നയിക്കാൻ നിങ്ങളില്ലെങ്കിൽ ഞങ്ങളുമില്ല, പ്രിയപ്പെട്ട മുരളിയേട്ടാ നിങ്ങൾ മതേതര കേരളത്തിന്റെ ഹൃദയമാണ്' എന്നിങ്ങനെയാണ് പോസ്റ്ററിൽ എഴുതിയിരിക്കുന്നത്.
ലോക്സഭാ തെരഞ്ഞെടുപ്പ് തോൽവിക്കു പിന്നാലെ കെ. മുരളീധരനെ പിന്തുണച്ച് നേരത്തെ തിരുവനന്തപുരത്തും കൊല്ലത്തും കോഴിക്കോട് നഗരത്തിലും ഫ്ലക്സ് ബോര്ഡുകള് പ്രത്യക്ഷപ്പെട്ടിരുന്നു. "നയിക്കാൻ നായകൻ വരട്ടെ' എന്നാണ് തിരുവനന്തപുരത്തെ പോസ്റ്ററില് എഴുതിയിരുന്നത്.