അണ്ണാമലൈക്കെതിരായ വിമര്ശനം: തമിഴിസൈ സൗന്ദര്രാജനെ പരസ്യമായി ശകാരിച്ച് അമിത് ഷാ
Wednesday, June 12, 2024 1:39 PM IST
വിജയവാഡ: തമിഴ്നാട്ടിലെ ലോക്സഭാ തെരഞ്ഞെടുപ്പ് പരാജയത്തിൽ ബിജെപി സംസ്ഥാന അധ്യക്ഷൻ കെ. അണ്ണാമലൈയെ വിമര്ശിച്ച തമിഴിസൈ സൗന്ദര്രാജനെ പരസ്യമായി ശകാരിച്ച് അമിത് ഷാ.
ആന്ധ്രാപ്രദേശിലെ വിജയവാഡയിൽ ചന്ദ്രബാബു നായിഡു സര്ക്കാരിന്റെ സത്യപ്രതിജ്ഞാ വേദിയിൽ നടന്ന സംഭവത്തിന്റെ വീഡിയോ ദൃശ്യങ്ങൾ പുറത്തുവന്നിരുന്നു. പ്രധാനമന്ത്രി നരേന്ദ്ര മോദിയും മുതിർന്ന നേതാക്കളുമുൾപ്പെടെ നിരവധി പ്രമുഖർ ചടങ്ങിലുണ്ടായിരുന്നു.
അമിത് ഷായും വെങ്കയ്യ നായിഡുവും സംസാരിച്ച് കൊണ്ടിരിക്കെ ഇവരെ അഭിവാദ്യം ചെയ്തുകൊണ്ട് അടുത്തേക്ക് വന്ന തമിഴിസൈ കൈകൂപ്പി അമിത് ഷായെ അഭിവാദനം ചെയ്തു. ഇതിനു പിന്നാലെ തമിഴിസൈയെ പേരുവിളിച്ച് അടുത്തേക്ക് വിളിച്ച ഷാ വിരൽ ചൂണ്ടിക്കൊണ്ട് അനിഷ്ടത്തോടെ സംസാരിക്കുന്നത് ദൃശ്യങ്ങളിൽ വ്യക്തമാണ്.
തമിഴ്നാട്ടിൽ ബിജെപിക്ക് കൃത്യമായ പദ്ധതികളുണ്ടായിരുന്നില്ലെന്നും അണ്ണാമലൈ കാര്യമായി പ്രവർത്തിച്ചില്ലെന്നുമായിരുന്നു തമിഴിസൈയുടെ ആരോപണം. ചെന്നൈ സൗത്തിൽ നിന്ന് മത്സരിച്ച തമിഴിസൈയും പരാജയപ്പെട്ടിരുന്നു.