മുല്ലപ്പെരിയാര്: കേന്ദ്ര പരിസ്ഥിതി മന്ത്രാലയം വിളിച്ച യോഗംമാറ്റി
Tuesday, May 28, 2024 9:43 AM IST
ന്യൂഡല്ഹി: മുല്ലപ്പെരിയാറില് പുതിയ ഡാം പണിയുന്നതിന്റെ പരിസ്ഥിതി ആഘാത പഠനവുമായി ബന്ധപ്പെട്ട് ഡല്ഹിയില് ഇന്ന് നടക്കാനിരുന്ന യോഗം മാറ്റിവച്ചു. കേന്ദ്ര പരിസ്ഥിതി മന്ത്രാലയം വിളിച്ച യോഗമാണ് മാറ്റിയത്. യോഗം മാറ്റിയതിന്റെ കാരണം കേന്ദ്രം വ്യക്തമാക്കിയിട്ടില്ല.
നേരത്തെ, പഠനത്തിന് കേരളത്തിനെ അനുവദിക്കരുതെന്ന് തമിഴ്നാട് ആവശ്യപ്പെട്ടിരുന്നു. മുല്ലപ്പെരിയാറില് പുതിയ അണക്കെട്ട് നിര്മിക്കാനുള്ള കേരളത്തിന്റെ നടപടികള്ക്കെതിരേ തമിഴ്നാട്ടിലെ കര്ഷക സംഘടനകള് രംഗത്തെത്തിയിരുന്നു. കേരള- തമിഴ്നാട് അതിര്ത്തിയിലെ കുമളിക്ക് സമീപം ലോവര് ക്യാമ്പില് പെരിയാര് വൈഗ ഇറിഗേഷന് കര്ഷകകൂട്ടായ്മയുടെ നേതൃത്വത്തില് കര്ഷകര് മാര്ച്ച് നടത്തി.
അതേ സമയം, മുല്ലപ്പെരിയാറില് പുതിയ അണക്കെട്ട് നിര്മിക്കുന്നതിനുള്ള വിശദമായ പദ്ധതിരേഖ ഒരു മാസത്തിനകം പൂര്ത്തിയാക്കാന് കേരളം തീരുമാനിച്ചിട്ടുണ്ട്. പഴയ അണക്കെട്ട് പൊളിക്കുന്നതിന്റെ പാരിസ്ഥിതിക ആഘാത പഠനം നടത്താന് അനുമതിക്കായി കേന്ദ്ര വനംപരിസ്ഥിതി മന്ത്രാലയത്തെ സമീപിക്കുകയും ചെയ്തു.
തമിഴ്നാടിന് ആവശ്യമായ വെള്ളം നല്കിക്കൊണ്ട് കേരളത്തിലെ ജനങ്ങളുടെ സുരക്ഷ ഉറപ്പാക്കാനാണ് സംസ്ഥാന സര്ക്കാരിന്റെ തീരുമാനം.