ഹജ്ജിനുള്ള ചാര്ജുകള് വര്ധിപ്പിച്ച നടപടി പിന്വലിക്കണമെന്ന് ബിനോയ് വിശ്വം
Sunday, January 28, 2024 10:59 PM IST
തിരുവനന്തപുരം: ഹജ്ജിനുള്ള എംബാര്ക്കേഷന് പോയിന്റായി കോഴിക്കോട് എയര്പോര്ട്ട് ഉപയോഗിക്കുന്ന തീർഥാടകര്ക്കുള്ള ചാര്ജുകള് വര്ധിപ്പിച്ച നടപടി പിന്വലിക്കണമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം എംപി. ഈ ആവശ്യമുന്നയിച്ച് അദ്ദേഹം കേന്ദ്രമന്ത്രി സ്മൃതി ഇറാനിക്ക് കത്ത് നല്കി.
മലബാർ മേഖലയിൽനിന്ന് ആയിരക്കണക്കിന് മുസ്ലീംകളാണ് തീർഥാടനത്തിനു പുറപ്പെടുന്നത്. വര്ഷങ്ങളായി എംബാര്ക്കേഷന് പോയിന്റായി കോഴിക്കോട് വിമാനത്താവളം പ്രവര്ത്തിച്ചുവരുന്നു. എന്നാല് കോഴിക്കോട് വിമാനത്താവളത്തില് നിന്നുള്ള തീർഥാടകർക്ക് 85,000 രൂപ കൂടുതല് ചാര്ജിനത്തില് നല്കേണ്ടിവരുന്നുവെന്നാണ് മനസിലാക്കുന്നത്.
ഈ വിഷയത്തിൽ അടിയന്തര ഇടപെടൽ വേണമെന്നും ഹജ്ജ് ചാർജുകൾ ന്യായമായി മാത്രം ഈടാക്കുന്നുവെന്ന് ഉറപ്പാക്കണമെന്നും ബിനോയ് വിശ്വം കത്തില് ആവശ്യപ്പെട്ടു. കത്തിന്റെ പകര്പ്പ് കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യക്കും നല്കി.